Vawiin khan Kolasib District chhung Assembly constituency pathum 4-Tuirial, 5-Kolasib  leh 6-Serlui Final Electoral Roll chu Kolasib DC & District Election Officer Pu Jitendar Yadav, IAS chuan a duh apiang en theih turin DC Conference Hall-ah a pho chhuak.

Pu Jitender Yadav chuan kan hma lawka MP inthlan lo awm tur atan Electoral roll thar hi hman a ni dawn a ni tih sawiin Vote nei thar mi engemawzat hetah hian dah luh an ni, a ti a. Vote nei tharte a lawmpui thu sawiin Election Branch te thawhrimna pawh a fakawm hle a ni, a ti a ni.

Electoral Roll phochhuahna inkhawm hi Pi Saizikpuii, Election Officer chuan a kaihruai a. Vote updation an tih dan sawifiahin he huna kal ten an hriatthiam loh thil thenkhatte a hrilhfiah bawk a ni.

Vawiina final publication of Electoral Roll ang chuan Kolasib District-ah service voter zawng zawng tiamin vote nei mi 52292 an awm ta a. Vote nei thar punna hi 1180 niin voter 511 paih a ni. 4- Tuirial ah hian vote r punna chu 371 a ni a, paih zat 198 a ni a, 5 Kolasib-ah voter  385 thun belhin voter  130 paih a ni. 6- Serlui-ah voter 424 thunluh belhin 183 paih a ni bawk a ni.

 A duh apiang tan E-Roll thar hi DC Office, Election Branch-ah office hun chhungin en theih a ni.