769/2022-2023
Aizawl, the 3rd June 2022: Vawiin khan St John’s Higher Secondary School Auditorium, Kolasib-ah Fire Department leh Education Department tangkawpin Fire Safety Awareness chungchanga inzirtirna leh hemi chungchanga Fire Service week 2022 Essay Competition a tit ha chawimawina hun an buatsaih a. Kolasib DC Pu John LT Sanga chuan hmanpuiin he hunah hian Fire Service week 2022 puala Essay writing competition an buatsaih a lawmman pahnih latu Lalthangmawii, Class X, St John HSS hnenah a lawmman lak hi hlan nghal a ni.

Pu John LT Sanga chuan Kangmei ven chu mitin mawh a nih thu sawiin, ‘Nikum lawkah Mizoram chhim lamah kangmei nasa tak a chhuak a, a thelh turin khawtlang kan buai a, Phawngpui tlanga kan National park te pawh a kang lek lek hial a. State pawn atang pawhin ngaihven a hlawh hial a ni. Khatiang kangmei nasa a chhuah chhan kha a bulah chuan kan fimkhur tawk loh vang a ni thei a. Chuvangin kangmei tichhuak lo tur hian kan fimkhur a ngai a ni’ a ti.

Kolasib DC chuan, ‘Kangmei tichhuak lo tura fimkhur hi kan In atanga kan tan a ngai’ tih sawiin, ‘Kan eirawngbawlna te, Vawk chaw kan chhumna te hi a mit chiang ngei a ni tih hre lo chuan kan kalsan loh a ngai’ a ti a.Disaster Management & Rehabilitation Department a awm lain Kangmei chhuah chhan tam tak chu vanduai vang ai mahin fimkhur loh vang a ni tih a hmuh chian thu a sawi a. Heng kangmei chhuak ta te chhuahchhan tam zawk chu Ar leh Ran in a Electric kan pawhna te uluk tawk loh vang a ni a ti. Lalthangmawii, Class X, St John HSS in kangmei laka kan himna turah zirtirna tha tak a ziak chu a chhuang hle tih a sawi a. School naupang dang te pawh kangmei tichhuak lo tura fimkhur leh midangte zirtirna petu ni turin a chah bawk.