770/2022-2023
Kolasib dated 3rd June 2022: Vawiin chawhnu khan Thingdawl Community Hall-ah 'Credit Disbursement (Bank Loans/ Community Funds) and Distribution of Sewing Machines for Kawnpui VO-III Apparel Unit' hun hman a ni a. Pu Gaston Vanlalhriatpuia, BDO, Thingdawlin hun kaihruaiin Pu Lalruatkima, Minister, Rural Development Department chu khuallian a ni a, Pu K.Laldawngliana, MLA chu khual zahawm a ni.

He hunah hian Minister Pu Lalruatkima chuan Mizoram Rural Livelihood Mission hnuaiah hian Rural Development Block 26 ah hmalak mek a nih thu leh Aizawl leh Lunglei district-ah pawh bultan a nih thu a sawi a. Hmeichhiate dinhmun chawikan nana eizawnna ngelnghet leh rintlak siam tur a Self Help Group (SHG) member-te hnen a pawisa puk tir te chu tipung a, chhungkua tih hmasawn nana tangkai tak a hmang turin SHG te a chah a ni. Eizawnna chu inelna huang zau tak a nih avangin hlawhtling tur chuan midangte aia inpekna leh taimakna neih a pawimawh thu a sawi a, MzSRLM kaltlanga hmalaknaa mizo hmeichhiate tih hmasawnna hna kalpui mek chuan chhungkaw tam takah awmze neiin hmasawnna nasa tak a thlen ngei a beisei thu a sawi a ni.

Pu Lalruatkima chuan chhungkaw khawsak dinhmun siamthatna tura SEDP kalpui tan mekah mahni tuina leh dinchhuahpui ngei tur trade thlang thiam turin kalkhawmte a chah a, khawvel hmasawnna in a ken tel social media hman kawngah inzir thar leh fimkhur a tul thu a sawi bawk a ni.

Khual zahawm Pu K.Laldawngliana, MLA, Tuirial Assembly Constituency chuan MzSRLM kaltlanga Community Fund Village Organization te hnena puk tur sem chhuahte chu dik tak leh rinawm tak a, hlawhtlinpui tum a taimakna nen hmang turin a chah a, hmeichhe dinhmun chawikanna chuan ram hmasawnna kawngah thui tak a hril thin thu a sawi bawk a ni.

Pi H.Lalchhandami, CEO, MzSRLM chuan Mizoram chhunga Self Help Group tih changtlunna kawnga MzSRLM hmalakna hrang hrangte tarlangin Thingdawl RD block hnuaiah hian SHG 400 awmin member 3059 an awm mek thu a sawi a, eizawnna ngelnghet nei tura thiam thil hrang hrang inzirtir chu MzSRLM hnathawh zing a pawimawh tak a nih thu a sawi.

Vawiin hian Sekibuhchhuak Cluster Level Federation hnuaia Village Organisation 6 a SHG 19 hnenah leh Intodelh Cluster Level Federation hnuaia Village Organization 4 a SHG 8 hnenah Community Fund cheng Nuai 47.5 semchhuah a ni a. Community Enterprise Fund hi SHG member 6 te hnenah cheng Nuai 5.53 sem chhuah a ni bawk.

Vawiin Community Fund semna hunah hian Start Up Village Entrepreneurship Programme kalpui hlawhtlingte chanchin ngaihthlak a ni a, Cluster Level Federation-a hmalaknate tarlan ni bawkin Minister Pu Lalruatkima hian Thingdawl BDO office-a thawkte kawmna hun a hmang nghal bawk a ni.