Vawiin khan ram kang leh kangmei chhuak thei venna tur hapta Fire Prevention Week chu Diakkawn YMA Hall ah hawnna neih a ni a, Week hi Kolasib Bawrhsap leh Chairman Kolasib District Fire Prevention Committee ni bawk Pu H. Lalengmawia, IAS in a hawng a ni.
Pu H. Lalengmawia chuan Pathianin mihring te leh thing leh mau te hi in hne rema inchawmtawn turin min siam a, chuvangin ram tikang leh a tichereu zawnga hma latu reng reng chu hnam hmelhma ni mai lovin Pathian dan siam leh remruat bawhchhe tu an ni, a ti a. Mizoramah ram kan tih kan leh ram kan tih chereu nasat avangin kan tuihna a kang chak hle a, tuihna siamthat nan thing leh mau kan chin uar a, ram kang tur kan ven loh chuan kan damlai ngei hian a nghawng tha lo kan tuar ang tih a hlauhawmin ngaihtuah tham a ni, a ti bawk.
He hunah hian Village Council Member kalkhawmte chu an mahni khua leh veng ah theuh kangmei laka invenna leh fimkhur a tul zia inzirtir uar a, meikawngte zau taka sial tha a, Sawrkarin lo hal zawh a tuk March ni 15 ral hma ngei a an ram te hal turin leh hemi chungchang hi FLS in kartin vawi hnih aia tlem lo tlangau turin a hrilh a. Kolasib District chhunga Village Council area huamchhunga, thil tul lo leh lo nei tan nilova, ram tikang reng reng chu VC te kumkhat chhung development lamah hren an nih tur thu leh ram tikangtute chu zawnchhuah a dan hnuaia an phu tawk angin hrem an nih tur thu DC hian a sawi a. Ram kang tur venna kawnga District hma la tha ber ni turin District mipuite, VC te, tlawmngai pawlte leh hemi kawnga thawktu te tang ho turin DC hian a sawm bawk a ni.
Week hawnna ah hian Pu Saurabh Sharma, Divisional Forest Officer chuan Fire Prevention Week atana ruahmanna leh kawng hrang hranga hma lak tum dan te Report a tarlang a. Kolasib District chu Fire Prevention lamah nikum khan District zawng zawngah pahnihna a nih thu a tarlang a. Kumin chuan VC ti tha te bakah kangmei venna lama mimal thawk tha leh thawhhlawk leh hemi kawnga mipuite zirtirna pek lama tan la te chawimawi a nih tur thu a sawi tel bawk.
He programme-ah hian Project Veng Branch YMA chuan kangmei laka fimkhur a tul zia inzirtirna chu lemchang hmangin an entir a. Sub-Headquarters YMA Kolasib leh Joint VC Kolasib District aiawhte pawhin thu an sawi a ni. Hawnna programme zawh hian Kolasib Forest Division bultumin sikul naupangten Fire Prevention chungchang inhrilhhriatna atan kawng an zawh a ni.
