Vawiin chawhma dar 10:30AM khan DC’s Conference Hall-ah Pu R.Zarzosanga IAS, District Level Fire Prevention Committee Chairman leh Siaha District Bawrhsap ni bawk kaihruaina hnuaiah “Fire Prevention Week” hawnna hun hman a ni. He Fire Prevention week Opening Function hi Pu RT Zachono, CEM, MADC chuan khuallian niin a hmanpui.

He Hunah hian Khuallian Pu RT Zachono chuan thu sawiin, Mei leh tui hi mihring nunna atana thil pawimawh berte zinga mi an ni mek laiin, kan fimkhur loh vang leh pawisak kan neih thin loh avang hian Tui leh Mei hian nunna tam tak a suat mek a. Ramngaw leh kan nunna hi inzawm tlat tura khuarel a ni a, kangmei laka kan fimkhur lohna hian vawiina kan nun-ah chauh ni lovin, kan thla te zelah pawh nasa takin nghawng a la nei zel dawn a ni, a ti.

Pu KH. Beihlo, EM (Forest), MADC pawhin thusawiin, Bible-a kan hmu angin, Adama leh Evi te Eden huana Pathianin a dah khan theirah te eia, huan enkawla; venghim turin a dah a ni. Tih chereu tur nih lovin, Chu chu Ramngaw ( Huan) leh Mihring te inkungkaih dan tur khuarel chu a ni. keini ringtute chuan zawm theuh i la, kangmei laka kan ramngaw te leh In leh lo te hi I humhalh tlat ang u, tiin kalkhawmte a sawm.

Pu Solai Azyu, ACF,MADC in Kangmek laka kan ramngaw te humhalh tura Fire Prevention Committee leh Forest Dept, MADC hmalak dan leh hmachhawp te mipui hnenah report a pe bawk.

Vawiin Fire prevention week opening Function hi Pi Marilyn Rualzakhumthangi, SDO(S) in Lawmthu sawiina in a khar ta a ni.