Vawiin khan Kolasib district chhunga kangmei venna hapta 'Fire Prevention Week' hman dan tur relin DC Conference hall-ah District bawrhsap Pu R. Zarzosanga IAS hovin 'District Level Fire Prevention Committee'-ten meeting an nei.

Meeting-ah hian member secretary Lalnunzira, DFO chuan state level committee-in kangmei ven hapta atan February 12-17, 2018 a lo ruahman tawh dan a sawi hnu in kum kaltaa Fire Prevention Week hman tawh dan leh hmalakna kalpui tawh dan report a pe a, hei hi kalkhawmte chuan an sawiho hnuah kum kaltaa hmalakna zulzuiin kuminah kangmei ven hapta hman dan tur hi rel a ni.

Committee chuan February 12-ah Kangmei Ven Hapta hawnna chu Taitesena Hall-ah neih nise a ti a, khuallian atan district bawrhsap Pu R. Zarzosanga chu beisei niin hawnna huna tel tur hian sorkar hnathawk hrang hrang, NGO hrang hrang hruaitute bakah lirthei khalhtute, Kohhran hruaitute leh political party hrang hrang hruaitute chu sawm nise an ti.

Hapta hman chhung hian kangmei laka fimkhur a tul zia a zau thei ang bera puanzar nise an ti a, state level committee-in a lo rel tawh angin lo hal hun hnuhnung ber atan March 15, 2018 a lo rel tawh chu khauh taka kenkawh nise an ti bawk. Hemi bakah hian district administration lamin kangmei tichhuak lo tura khapna thupek chhuah bawk se an ti a, dan bawhchhiate hremna tur leh a kaihhnawihte chu VC hrang hrangah hriattir nise an tih bakah kangmei venna kawnga a thawktha khuate hnenah lawmman siamsak leh nise an ti bawk.

Meeting-ah hian Kolasib khawchhunga department hotute leh tlawmngai pawl hruaitute an tel a ni.