Khawlaia inthiar (daikal) awmlohna tura hmalakna kal zelah vawiin khan Kolasib-ah “Freedom From Open Defecation Week” 9th - 15th August, 2017 chhunga hman tur hawnna inkhawm Diakkawn YMA Hall-ah neih a ni a, Kolasib Bawrhsap Dr. Arun T., IAS chuan a hawng.
Hawnna inkhawmah Dr.Arun T. chuan thianghlimna hi mimal leh khawtlang hriselna atana thil pawimawh hmasaber a nih thu sawiin, thianghlimna kawnga PHE hmalakna chu lawmawm a tih thu leh thlawp vek turin kalkhawmte a sawm a ni.
Vawiin hapta hawnna inkhawm hi Pu H.Lallianmawia, Sr.EE PHE, Kolasib Division in a kaihruai a, thianghlimna chungchang inzirtirna hun Er.Lalliantluanga Chohte-in a nei a ni.
Swachh Bharat Mission (Gramin) hnuaiah Kolasib District hi Open Defecation Free a puan a ni tawh a. Ekin neilote tan ekin 641 sak tawh niin, Vantlang inthiarna 20 sak a ni tawh bawk a. Hei bakah hian bawlhhlawh sawngbawlna hmun tur kum 2017-2018 chhung hian khaw 20 ah hmalak tum a ni a, 1st Phase-ah khaw 6 - Saiphai, Bilkhawthlir, Meidum, Thingdawl, Hortoki leh Lungdai-ah te hmalak mek a ni.
Sorkar laipuia Ministry of Drinking Water & Sanitation chuan August 9th - 15th, 2017 chhung hi ah a puang a. He programme hi India rampum khawlaia inthiar awm tawh lohna a nih thuai theihna atana hmalakna a ni.
Freedom From Open Defecation Week pual hian Kolasib District chhunga YMA Branch zawng zawng te’n khawlai tihfai hnatlang 12th August 2017 zing hian neih a ni dawn a ni. He hapta pual hian Auto-rickshaw-ah poster hrang hrang tar a ni bawk.
