Vawiin chawhma dar 11 khan Parish Hall, Venglai Kolasib-ah New Economic Development Policy (NEDP) peng pawimawh tak Entrepreneurship Development Scheme (EDS) hnuaia hmalakna inzirtirna leh Business Plan Contest, 2017 kalpui mek chanchin inhrilhfiahna hun (Outreach programme) hman a ni.
He hunah hian District Bawrhsap Dr. Arun T., IAS chuan thusawiin thalaite’n mahni kutkea dinga hma an lak ve theih nana hun tha buatsaih sak an ni chu lawmawm a tih thu sawiin, thalaite he hun tha hi bawhpelh lova an ngaihtuahna te a taka chan tir thei tura hma la turin a fuih a ni.
He hun ah hian EDS Master Trainer Dr. Lalbiakzuali chuan Mizoram Sawrkarin NEDP hnuaia EDS a duanchhuah dan leh hmalakna tur leh hmachhawp hrang hrangte a sawifiah a. Anna Zorinmawii, Co-ordinator Local IIM Team chuan EDS hnuaia Business Plan Contest (Mizoram Kailawn) 2017 kalpui mek chungchang leh tel ve tura tih dan turte a sawifiah a, la tih ngailo leh tih tawhte tan pawha hlawhtlinpui thama hmalak dan tur hriate leh ngaihtuahna neite chu he contest ah hian tel ve ngei turin a sawm a. Govt. Kolasib College a zirlai pali te chu Ambassador atan an ruat nghal bawk.
Mizoram Business Plan Contest-2017 hi Sumdawnna kawng thar ruahmanna tha neite inelna tur a ni a, hetah hian hmalakna hlawk leh awmze nei tura ngaihte ruahmanna thehlut in, chuta tang mithiamte’n a tha than tih an thlangchhuak anga, Sawrkar chuan thlanchhuahte bul tanna tur lawmman a siamsak dawn a ni. Hemi a tel duh leh ruahmanna thehlut duhte tan www.mizoramkailawn.org ah emaw www.mizoramkailawn.com ahte Internet kal tlanga inziah luh theih a ni a. Ruahmanna hi 31st August, 2017 thleng thehluh theih niin, mithiamte’n round-2 a an thlitfim hnuah final leh Entrepreneurship Summit chu October Ni 10, 2017 ah neih tur a ni.
