No.1916/2020-2021

Green Mizoram Day 2020 pualin Kolasib district hmun hrang hrangah thing phunna neih a ni a. Tukin zingkar khan Green Mizoram day pual hian Kalvari Home, TNT Centre-ah Dr H Lalthlangliana, Deputy Commissioner, Kolasib chuan thing phunin, Green Mizoram Day avang hian Mizoramah thing a pun belh mek thu a sawi a, thing phun hi a bultanna a ni, a ti a, enkawl puitlin zui a nih theih nan mitinin mawhphurhna kan neih te hlen chhuak theuh turin a chah a ni. He hunah hian Pu Laltlanhlua Zathang, DFO, Pu Vanlalfaka Ralte, SP leh Forest department thawktu thenkhat te an tel a ni.

Kolasib khaw chhung bikah Sawrkar Department leh pawl hrang hrangte hnenah DFO Office atangin thing tiak 311 phun tur a pek chhuah a ni a. Kolasib Forest Division hnuai a Range hrang hrangah Green Mizoram Day hi hman ni bawkin thing tiak thahnem tak phun leh sem a ni.

Agriculture Department hnuai a FOCUS leh Kolasib Forest Division ten Green Mizoram Day pual hian vawiin khan khaw 12 ah thing tiak 1200 an phun bawk a ni.