No.1915/2020-2021

Lawngtlai, Nikir thla ni 11, 2020: Kum tina June ni 11-a hman thin Green Mizoram Day pualin vawiin khan Lawngtlai Bawrhsap Pi Shashanka Ala, IAS leh mi pawimawh dangte'n Lawngtlaia tawngtai tlang, Bethel Prayer Mount-ah thing tiak an phun.

COVID-19 hri leng avangin kum dang angin Green Mizoram Day hman theih a ni lo va. Hei vang hian District Level Committee on Green Mizoram ai awhin Lai Autonomous District Council (LADC)-a Environment, Forest & Climate Change Department chuan ruahmanna siamin, he ni pual hian Lawngtlai Bawrhsap Pi Shashanka Ala bakah, Superintendent of Police Pu Amit Goel, IPS leh LADC-a Executive Secretary Pu H. Lalramenga te'n Bethel Prayer Mount-ah hian thing tiak an phun a ni.

LADC EF&CC Department hian COVID-19 laka him tura sawrkarin inkaihhruaina a siam zawm chunga thing phun duhte'n thing an phun theih nan ruahmanna an siam a. He ni pual hian thing tiak pawh 750 sem chhuah niin, sawrkar office, pawl leh mimal te'n an remchan danin an phun hlawm dawn a ni.

Green Mizoram Day hi a tirah chuan Green Aizawl tiin kum 1998 khan Aizawlah hman tan a ni a. Kum 1999 atangin Green Mizoram tih hming chawiin ram pumah hman a ni. Lawngtlai District bikah chuan kum 2000 atang khan hman tan niin, kum tin hman a ni a. Nikum Green Mizoram Day-ah khan sawrkar office hrang hrang leh tlawmngai pawl te'n Mampui kawngah thing tiak 335 an phun a. Za zelah 85 (85%) nungin, a nung lote pawh hi LADC EF&CC Department chuan thlakthleng vekin, an enkawl zui a ni.