“Thing phunin sik leh sa vawng tha rawh” tih thupui hmangin Vawiin khan Parish Hall, Venglai Kolasib ah District Level Green Mizoram Committee, Kolasib bul tumin ‘Green Mizoram Day’ hman a ni,  District Bawrhsap Pu Zoengsanga chu khuallian niin he hun hi a hmanpui.

Khuallian chuan Green Mizoram Day hmang tura lo kal khawm zawng zawngte chibai buk in, Green Mizoram Day hman ngai khawpa kan ram kan suasam erawh hi chu a pawiin a lungchhiat thlak ani a ti. Pathian in he khawvelah hian thil chi hrang hrang siamin a dah a, ramsa te, thing leh maute, mihringte a siama, chung ho te chu inngeih tlang taka cheng ho turin a dah a, in mamawh tawn vek kan ni tiin ramngaw leh nungcha te duat taka enkawl tura Pathian in mihringte min dah ang ngeiin kan enkawl tur ani a ti. Mizoram chhim tawp leh hmar tawp thlengin ram chereu nasa lutuk hmuh tur a tam ta a, lamlian chhak leh thlang te en in thing leh ngaw hmuh tur a tlem ta khawp mai a, keimahni ngei ina kan ram kan tichereu hi a lungchhiat thlak a ni a ti.
Khuarel chhhiatna a vang te, kangmei avanga mihringte chenna in a chhiat in, a vanduai thlak zia leh a hreawm zia kan hria a, chutiang bawkin Ramsa te hian chenna tur hmun ‘ramngaw’ an mamawh a, ka tihchhiat sak hian an awmna tur kan tih chhiat sak ani a ti. Chuvang in ramngaw tihpun zel hi kan mawhphurna a ni tiin Kan ram lo lum chho zel na chhan pawh ramngaw kan neih tlem vang ani ati.

Thing leh Mau te ti chereu tu nilova a humhalh tu nih tum turin kalkhawmte a chah a, Ram dang mi ten ramngaw min rawn siamthat sak dawn lova, keimahni ngei hian a awmsa humhalh in ramngaw i siam ang u a ti.

Pu Lalnunzira DFO chuan nikum Green Mizoram Day khan Thingdawl Nursing School Campus ah thing tiak 164 phun anih thu a tarlang a, Kolasib khawpui leh a chhehvel ah thing tiak 17,370 phun anih thu a tarlang bawk.
He hun ah hian Kolasib District chhunga kangmei laka Ramngaw venghim tha te lawmma semna hun hman ani a, Lawmman pakhatna Khamrang khua in tangka fai Rs. 50,000/-, pahnihna N.Chhimluang khuan in cheng  30,000/-, pathumna N.Hlimen khua in cheng 20,000/- leh Citation an dawng theuh a ni.

He Programme  kaihruaitu, Pu C. Liankunga, President, Sub-Hqrs YMA kaihhruaina in Green Mizoram Day thutiam sawi rualna kalkhawm te’n an hmang a, Programme hman zawh hian St. John Higher Secondary School Campus leh Thingdawl Nursing Home ah te thing phunna (mass planting) neih zuih a ni.