Vawiin Green Mizoram Day 2019 hian Serchhip District Committee on Green Mizoram in a lo rel tawh angin Serchhip leh Thenzawl inkar kawngpuiah leh Thenzawl a 18 Holes Golf Course complex ah te thingphun hnatlang neih a ni a. Mizoram thing chi hrang hrang 970 phun a ni.

Day hawnna inkhawm tawi leh lawmman semna hun Zawlpui Peng ah buatsaih hmasak niin he hunah hian khuallian Pi Sangchhin Chinzah, district bawrhsap a ni a. Khuallian chuan, vawiin thlengin India hmar lamah chuan boruak lum fawn vel (heat wave) an tuar a. Mizoram ngei pawh hriat theih china khawlum ber tum te kan thleng chho mek a ni. Hetiang boruak lum hi kum tela a pun chhoh zel chuan mihringte tan dam khawchhuahna a har zual zel dawn tihna a ni. Chutiang a awm loh nana kan tihtheih pawimawh em em chu thingphun hi a ni a. Nasa zawka kan beih sauh sauh a ngai a ni, a ti a. Phun ringawtah tawp tum lovin kan phunte kha an puitling ngei em tih kan umzui leh ngei theuh dawn nia, tiin thingphun tura kalte a ngen a ni.

He hun hi Pu Lalduhthlana, DFO Thenzawlin a kaihruaia, Green Mizoram Day Serchhip District a hman  alo nih tawh dan report tlangpui a pe a. Pu K. Saitluanga, DIPRO kaihhruaiin kalkhawm ten Green Mizoram Day thutiam an sawi rual a ni. Tin, District chhunga kangmei ven kawnga hnathawk tha khua te hnenah lawmman sem nghal a ni a. Lawmman dawngtute chu; Pakhatna Keitum, pahnihna Leng leh pathumna Chhingchhip Mualpui te an ni. Pakhatna hian Citation leh Rs. 50,000, pahnihna in Citation leh Rs. 30,000 leh pathumna in Citation leh Rs. 20,000 te an dawng a ni. Serchhip atanga chhuak nitin chanchinbu kangmei ven kawnga mipuite zirtirna lam hawi tichhuak tha te hnenah lawmman pek a ni bawk a. A dawngtute chu pakhatna Zothlifim, Rs 50,00 leh Citation, pahnihna Lamkal Rs. 3,000 leh Citation leh pathumna Ramlai Arsi, Rs. 2,000 leh Citation te hlan an ni bawk.

Pu R. Sanghmingthanga, President, Sub-Headquarters YMA chuan lawmthu sawina a hmang thung a. He programme tawi zawhah hian khuallian leh District level committee on Green Mizoram ten thingphunna hun an hmang zui a, chumi zawhah Department leh tlawmngaipawl hrang hrang hlawm 30 ten thing 570 phun hnatlang an nei zui nghal a, remchang hmasa berah EF&CC Department ten an hung sak anga, anmahni phun theuh hi an enkawl zui dawn a ni.

Hetih lai vek hian Thenzawla 18 Holes Golf Course sak mek Complex chhungah Serchhip District Level on Green Mizoram ruahmanna angin Thenzawl SDO Pi Pinky Zosangpuii kaihhruaina hnuaiah Department Office leh tlawmngaipawl hrang hrang hlawm 17 ten Thing 400 phun hnatlang an nei ve bawk a ni.