Green Mizoram Day 2017 hmanna pui ber chu Chief Minister Pu Zoramthanga, Chairman, State Level Committee on Green Mizoram ni bawk hovin tukin zing dar 7 khan 23 Sector Assam Rifles hmunhma, Khatla ah hman a ni. He hunah hian Green Mizoram Day pualin Chief Minister, Ministers, MLA leh Sawrkar mi pawimawh ten thing phunna hun 'Ceremonial Planting' an nei nghal a ni.

Chief Minister chuan Green Mizoram Day chu Green Aizawl Day a bultan niin, Mizoram pum huap hmalakna a nih theih nana 1999 atangin Green Mizoram Day tia thlak a hman thin tak a nih thu a sawi a. Khawvel pum boruak lo inthlak danglam leh lum zel hi buaipui tham a nih thu te, hun reiloteah mihring te tan tuarna nasa zawk a thlen theih dawn avangin mitinin an theihna zawn theuhva hma an lak a ngaih thu a sawi a. Mizoramin tun dinhmunah thing leh mau a nei tam chu a la vanneih thu Chief Minister hian a sawi a. Ti hring belh tura hma lakna ah erawh awmze nei takin nungcha te tlan duh tur ang rah chhuah thei te, mihring tana hmuh nuam leh khualzin hip theitu tur thing par chi phun tel tha a tih thu a sawi. Chief Minister chuan environment humhalh leh ram eizawnna chu a kal kawp theih thu sawiin, economic plantation- sum a chantir theih thingphun tur thlan uluk a tul thu a sawi a. Hemi kawnga sawrkarin a hmalakna lian ber Bamboo plantation- rua phun chu mipui eizawnna ngelnghet siam theihna a nih mai bakah boruak tithianghlim a, tui khawl kawngah te pawh a tangkai tel thu a sawi. Chief Minister chuan plantation chu awmze nei taka kalpui chuan India hmarchhak state dangte tana entawntlak leh an hmalatu a nih theih thu a sawi.

Vawiina Green Mizoram Day hun kaihruaitu Forest Minister Pu T.J Lalnuntluanga, Green Mizoram Sub-committee Chairman chuan ram thing leh mau leh ramhmulte chu mihringte mamawh chi hrang hrang petu a nih thu a sawi a. Tuihna kangchat tawhte hre rengin, boruak sik leh sa inthlak nasa takte siamtha a ecological balance khawihchhiat a nih loh nante thing phun belh zel turin kalkhawmte a sawm a ni.

Kangmei venna kawnga District tithate leh Aizawl District huam chhunga mei kawng sial a khaw tit ha ber te hnenah Chief Minister chuan lawmman a hlan a. Kangmei venna kawnga District ti tha ber chu Champhai District niin, pahnihna chu Lawngtlai District an ni a, pathumna chu Kolasib leh Mamit District ten an intawm a. Aizawl District-a kangmei venna kawnga khaw ti tha ber chu Maubuang niin, pahnihna chu Chuanthar Tlangnuam an ni a, pathumna chu Phulpui an ni a. District ti tha ber hian lawmman cheng 50,000 bakah thuziak leh Khitea Running Trophy an dawng a District a titha pahnihna hian cheng 30,000 leh certificate dawngin, pathumna ten cheng 20,000 leh certificate an dawng v eve a. Khua tithate hian certificate An dawng vek bakah pakhatna in lawman cheng 50,000, pahnihna in cheng 30,000, pathumna in cheng 20,000 an dawng bawk a ni.

Principal Chief Conservator of Forests leh Member Secretary, State Level Committee on Green Mizoram ni bawk Dr. Ch. M. Rao chuan report pe in Green Mizoram Day tobul leh hman chhoh anih dante, hemi hnuaia hmalakna leh hmasawnna awm te a sawi a. Green Mizoram Day hman tan 1999 atanga 2018 thleng khan thingtiak 38,46,043 phun a ni tawh a. Kum 2013 atang hian thingphun te a nung zui em tih chhinchhiah tan a ni. Kumin a thingphun tur te hi Thlado, Khuangthli, April, Lamkhuang, Chawmzil, Tei, Theihai, Lenhmui, Ashoka tree, Silver Oak, Teipui, Herhse, Tatkawng, Hmuipui, Ficus, Theitat, Araucaria, Nganbawm, Archangkawm, Thingrai, Ngiau, Thingsaphu, Theitat, Tlaizawng, Sunhlu, Vanbe, Zawngtah, Makpazangkang leh adangte an ni.

Kum danga la tih ngailoh Green Mizoram Day Pledge khalkhawmten vawiin hian an sawiho a. Pledge sawi hi Pi P.B. Lianthangpuii, Deputy Director, I&PR Department chuan kaihhruaiin kumin Green Mizoram thupui "Thing phunin Sik leh Sa vawng tha rawh" a innghat a ni.

Vawiina Green Mizoram Day hi thuang hnih a hman niin zing dar 7:00 a programme hawnna leh ceremonial planting neih bakah hian chawhma dar 9:00 ah khan a hu hovin Sawrkar Department hrang hrangte, Assam Rifles troop te, NGO leh mimal ten pawl hrang hrang ten thing tiak 400 bawr vel chu programme neihna hmunah 23 AR hmunah plot dangah an phun a. Mass Planting neihna bakah hian MPSC leh sawrkar office thenkhat in an office bulah thing an phun bawk a, Green Mizoram Day hi Mizoram district hrang hrang ah thingphun hnatlang neia hun hman a ni bawk.