Mizoram hmun dangte rualin vawiin khan Lunglei-ah pawh “Thing phun in sik leh sa vawng tha rawh” tih thupui hmangin District Level Green Mizoram Committee buatsaih ‘Green Mizoram Day 2019’ hman a ni a, he Ni puala inkhawm 2nd Battalion MAP Complex Luangmual a neihah Lunglei DC leh District Green Mizoram Committee Chairman ni bawk Pi K Lalrinzuali chu khuallian a ni.

Green Mizoram Day 2019 hawnna inkhawm Lunglei DFO & Member Secretary District Green Mizoram Committee Dr C Vidhyasagar, IFS kaihhruaiah Pi K Lalrinzuali chuan khawvel changkang chho zelah leilung hausakna, thing leh mau te kan ti chereu nasa hle a, chuvangin ram kan tihchhiat leh hemi avanga boruak, sik leh sa danglam nasa lutuk veng leh siamtha leh turin theihtawp a tan kan lak a tul a ni, a ti. Environment, Forest & Climate Change Department-in rampum huapa thingphun lama an hmalakna chu a fakawm hle a ni tiin kum 1999 atanga nikum thleng khan Green Mizoram Programme ah thing tiak 5,43,923 zet phun leh sem chhuah a nih tawh thu a sawi a. Heng thing phunte nung ngei tur leh ti puitling ngei turin kalkhawmte chu uluk taka enkawl zui turin a chah bawk. Ramngaw leh nungchate humhalhna kawngah mitin ten mawhphurna pawimawh tak kan nei theuh a ni tiin  Lunglei DC chuan ramngaw leh nungcha humhalh pawimawh zia a hre tu mai nilo a, nunpuitu nih theuh tum turin kalkhawmte a sawm a ni

He hunah hian Lunglei  SP Pu C. Lalthanmawia kaihhruaiin Thutiam Sawihona (Pledge) neih a ni a. Pu Lalmuanpuia, MPS, 2nd Battalion MAP in thusawina hun aa hmang bawk.

ACF, Lunglei Forest Division Pu C. Lalthankima chuan report a pe a. Nikum 2018 Green Mizoram Day ah thing tiak 346 phun a nih bakah 16,114 sem chhuah a nih thu a tarlang a. Kumin Green Mizoram Day ah hian Department hrang hrang leh tlawmngai pawl ten 2nd Battalion MAP Complex chhungah thing tiak 927 an phun tur thu a sawi. Green Mizoram Day 2019 chu Lunglei District huam chhung khaw hrang hrang – Hnahthial, S. Vanlaiphai, Tawipui, Haulawng, Tlabung ah te hman a nih thu a sawi a. EF&CC Department hmalaknate phur taka an tawiawm thin avangin Lunglei District mipuite chungah lawmthu a sawi bawk a ni.

Vawiin Green Mizoram Day 2019 puala inkhawmah hian Lunglei District huamchhunga kangmei laka invenna (Fire Prevention) lama khaw tithate hnenah DC Pi K. Lalrinzuali’n lawmman a hlan nghal a. Chungte chu :

1) Zobawk  S - Rs.50,000/- + Citation ;

2) Darzo - Rs.30,000/- + Citation ;

3)Tawipui S - Rs.20,000/- + Citation

Hemi kawnga chanchinbu ti tha te pawh lawmman sem niin Lunglei DC Pi K. Lalrinzuali chuan lawmman a hlan a. Chungte chu :

1st Prize -  Zochhiar Daily Newspaper – Editor Pu Lianchama Chhangte;

2nd Prize – Hlimthla Daily Newspaper – Editor Pu Laltlanthanga;

3rd Prize – Zunzam Daily Newspaper – Editor Pu Thanghmingliana Renthlei.

Green Mizoram Day hawnna inkhawmah hian Lunglei-a sawrkar department hrang hrang officers & staff, MJA Lunglei President leh Member te, College leh School zirtitu leh zirlai te, kohhran leh tlawmngai pawl aiawhte an tel tha hle a. Nikuma an thingphunna hmunte sam faiin a hungna an siam a, 2nd Battalion MAP Complex-ah  thing tiak an phun belh theuh a ni.

Attachment

  • Loading attachment...