Vawiin khan Aizawl DC's Conference hall-ah District Level Co-ordination Committee for 7th Economic Census 2019 chu an Chairman Pu Vanlalngaihsaka, Aizawl District Bawrhsap hovin an thukhawm a. Aizawl District chhunga chhungkawtin te sum leh pai dinhmun bakah an eizawnna tlangpuite  zirchianna,  Economic Chhiarpui  Vawi 7-na kumina neih tura inpuahchahna te ennawn  a ni.

Meeting kaihruaitu, Aizawl Bawrhsap Pu Vanlalngaihsaka chuan Economic Census pawimawhna sawiin sum leh pai thawhchhuah kawnga chhungtin te  dinhmun chiang taka zirchianna chauh  a ni mai lova. District pum huapa hmalakna tura sawrkar project hrang hrang siamna atana hman tur data pawimawh tak tak chhawpchhuahna tur leh District chhunga sawrkar hmalakna tura sum rawn luanluh dan tur  bakah  hamthatna semchhuah dan tur chenin he Economic Census hian a hril dawn a ni a ti a. Bawrhsap chuan   Aizawl District chhungah Economic Census tha taka kapui a nih theih nan Enumerator te tha taka lo thawhpui turin khawtlang mipuite, VC te, Local Council te leh veng tina YMA hruaitute a sawm nghal bawk a ni.

7th Economic Census hmalakna hi kumin January 14 khan tan a ni tawh a. Election vuakvetah hun rei tak a khaihlak leh a; tunah hian Census Official tur te pawh  lak an ni mek a. Hetih rual vek hian Economic Census pual hian training te pawh neih chhoh mawp mawp a ni bawk a ni. Tin, Census atana chhawrtur ber Enumerator  hi engemaw zah la mamawh belh a ni a; Pawl 10 pass chin he hna thawk duhte chuan an awmna venga Common Service Centre(CSC)-ah emaw Aizawl DC Office a CSC - eGovernance India Office-ah emaw an dil  thei a ni. Census tan tur hian inpuahchahna a fel thawkhat tawh a; tunah hian Census atana hman tur  Mobile Apps pawh enchhin mek niin he Mobile Apps hi Central Sawrkarin a rawn tihnun veleh Census tan a ni dawn a.  Kumin October thla chhung hian 7th Economic Census chu zawh fela puanzar hman  tum a ni.

7th Economic Census atan hmalakna chhuzui tur hian Chief Secretary Chairman-na hnuaiah  State Level Commmittee leh District tinah Bawrhsap te Chairman-na hnuaiah District Level Committee a awm leh vek a ni. Aizawl  District DLCC for 7th Economic Census-ah chuan Aizawl Bawrhsap chu Chairman niin District Research Officer, Economics & Statistics chu  Member Secretary  a ni a. Member dang te chu General Manager of DIC, DLAO, DIPRO, District Employment Officer, DC's of State Taxes, Aizawl North North, South, East leh West bakah Directorate of Economics & Statistics hnuaia Concerned Supervisor te (Planning Officer 3) te an ni.