Vawiin khan nithum awh tur tualtah puan leh themthiam thil hrang hrang phochhuahna Handloom Fair chu Taitesena Hall Kolasib ah neih tan a ni a, Handloom Fair hi tukin chawhma khan Kolasib Additional DC Pu R. Lalremsanga'n a hawng. He Fair hi Ministry of Texiles bultum niin Mizoram Apex Handloom & Handicrafts Cooperative Society (MAHCO) buatsaih a ni.

Handloom Fair hawnna programme tawite ah Pu Lalremsanga chuan MAHCO hmalakna te chu fakawm a tih thusawiin Mizoramah mi tam takin handloom leh handicraft te hi eizawnna an hmang a. Mizoram bakah ramchhung hmun dang leh ram pawn ah te Mizo kutchhuak puan leh hetiang thil hi kan pho lan a, midangte Mizo handloom leh handicrafts zau zawka kan hmelhriattir a tul a ni, a ti a. Handloom lamah chuan hma kan sawn a, mahse themthiam thil handicrafts lamah hma sawnna leh zir tur tam tak a la awm nia a hriat thu a sawi bawk. Hetiang lama tuimi leh eizawnna nan hmang tute chu thahnemngai taka tan la zel turin a fuih a ni.

Handloom Fair hawnna inkhawm hi Pu Lalmuanpuia ARCS, Kolasib chuan kaihruaiin MAHCO in thahnemngai taka puantahtu te tana an hmalakna chu fakawm a tih thu a sawi. He Fair buaipuitu MAHCO Manager Pu K. Rothawmliana chuan puan tah tu ten Handloom leh Handicraft hmanga an dehchhuah puan leh thil dangte man tlawm taka an phochhuah hi lei turin leh Fair hi chhim turin Kolasib mipui te chu a ngen a ni.

Handloom Fair ah hian stall 20 vel buatsaih a ni a, Zirtawpni November ni 6 thleng a awh dawn a ni.