Vawiin khan I & PR Conference Hall, Kolasib-ah Mizoram Board of School Education (MBSE) buatsaihin Kolasib District chhunga High School leh Higher Secondary School zirtirtute tan ‘Training on ‘Question Setting Technique’ tih thupui hmangin nikhat awh training buatsaih a ni. He training-ah hian MBSE siam kum 2020 Board Exam atanga hman tan tur Scheme of Examinations and Question Design bakah Integrated Evaluation Scheme (IES) software update thar leh Software manual chungchang inhrilh hriatna neih nghal a ni.

He hun hmanpuitu Pu Lalthangbika, Secretary, MBSE chuan Mizoramah Board Exam pass percentage kum tinin a sang a, chutihrualin Mizo zirlaite India ram chhung hmun dangte leh ram pawna zirlai dangte nena an inelnaah a ti tha lo leh a hniam zawkah an tang fo mai a, hei hian quality education kan neih that tawk lohzia a tilang nia hriat a ni ati. Zirchianna hrang hrang neih hnuah exam-a zawhna set dan hian pawimawhna thuk tak neiin kan zirlaite leh zirtirtuteah nghawng nasa tak a nei tih hmuhchhuah a ni a. Hei vang hian Board pawhin kum 2020 HSLC leh HSSLC exam atanga hman turin exam dan kalphung leh zawhna zawh dan thar a duang a. Hemi zulzui hian kumin atangin zirtirna pawh kalpui mek a ni ati bawk.

MBSE Secretary chuan Training thil tum ber chu content-based question atanga competency based question tam zawk zirlai naupangte tana chhawp chhuah niin, hei hian an ngaihtuahna hman thiam kawngah te, an hmalam hun atan leh school-a zirna kalpui danah (quality teaching) tha zawka nghawng a neih ngei beisei a ni.

Kum hmasa lam atanga hman tawh IES software chu tha leh zuala thuam that niin hemi hunah hian a hman dan (user manual) nena sem nghal a ni. Training hi C. Laldinpuia, Senior Academic Officer leh Michael Lalrinmawia, Academic Officer MBSE te’n an pe a. Kolasib District chhunga High School leh Higher Secondary School zirtirtute mi thahnem tak an kalkhawm a ni.