Vawiin khan DC Conference Hall, Kolasib-ah kumina Independence Day lo awm tur hman dan tur chungchangah meeting neih a ni a. Meeting hi Addl. DC Pu Lalfela Sailo chuan kaihruai a, Kolasib District chhunga Sawrkar Pisa hotute leh aiawhte an tel kim hle a ni.

Meeting chuan chipchhiar takin Independence Day 2015 Kolasib a lawm dan tur a rel a, Department hrang hrang te mawhphurna pek nghal an ni a. A hmun atan Tumpui Field chu ruat niin, Parade Contingent-a lam tur chu Armed Contingent ah pakhat; Unarmed Contingent ah 6 leh School Contingent ah 7 beisei an ni a, anni hian August ni 11 leh 12 ah te practice neiin August ni 13 ah Final Rehearsal an nei ang. Meeting chuan Kolasib District Taekwondo Association in he Ni a Demonstration neih an dilna chu a ngaihtuah hnuin Independence Day ah hian Demonstration neih a chu a remti sak a. Kolasib District Bharat Scouts & Guides pawhin Independence Day-a Volunteers Duty atana tlawmngaih an duhthu ziaka an thlen pawh meeting hian a remti bawk a ni.

Kumtina tih thin angin kumin Independence Day denchen hian Kolasib a Home, Nau hnuchham in, Jail, Civil Hospital Poor Fund leh Vohbik naupang sikul te chu tanpuina pek rel a ni bawk a. Hemi atan hian Department hrang hranga thawhlawm khawn a, tanpuina chu chumi sum tlingkhawm atanga pek tur a ni anga, tanpuina khawn tur hian MJA Kolasib District chu mawhpurhna pek an ni.

Meeting chuan Sawrkar office-a thawk officer leh staff te chu Independence Day lawmna ngai pawimawha tel ngei ngei nise tiin a rel bakah mipuite pawh a zau thei ang bera sawm nise an tih bawk.