Indian Council of Agriculture Research (ICAR) chuan Mizorama ranvulh enkawlna hmun pakhat (Mini Satellite Research Centre) atan Khuangleng a thlang a, he hmalak bultanna atan hiuan cheng vaibelchhe khat a ruahman nghal bawk.

Hemi chungchangah hian Champhai DAH&VO Dr. Lalchungnunga Pudaite chuan India hmar chhak State tan  Nagaland a Nedziphema chu National Research Centre awm chhun anih vangin Mizoram a ranvulh,  a bikin Sial leh Bawng te awlsam zawk a enkawl anih ve theihna tura rawtna thlen anih hnu ah,  ICAR chuan Khuangleng chu Satellite Research Centre hmun atan a rawn thlan tak thu a sawi a. A hmun tur pawh AH & Vety Department in a thlanfel tawh thu tarlangin,  he Satellite Research Centre hian Mizoram Sorkar-in Flagship Programme NLUP a kalpui mek hnuaia Sial leh Bawng vulh thlangtu chhungkuate tan ranvulh leh enkawl kawngah nasa takin a tanpui thei dawn a ni, a ti.

Hmakhawsang ata tawh Mizote Sial vulh chu India hmarchhak state Nagaland leh Arunachal Pradesh-a Sialte aiin a pumrua te deuh mahse hnute tui a ngah zawk a,  hmun danga Sial lian chi nena thlah pawlh a tih dazat anih loh nan humhalh that nise tha an tih thu Dr. Lalchungnunga chuan sawiin,  Mizoram khawchhak tlangdung chu Sial vulhna hmunpui atan ruahman mek anih thu a sawi a.  Sial hi kum chhir a no nei, kum 4 vel a puitling thei leh Sial pakhat man Cheng sing 3-4 anih vangin ranvulh zingah enkawl manhla ber anih thu a tarlan bakah, sa a kan intodelhna turah kawngro a su hle dawn a ni tih Champhai DAH&VO chuan a sawi bawk.

Niikum May ni 8 khan AH & Vety Minister Pu C. Ngunlianchunga chuan Khuangleng a Sialte chu Micro Chips dahin alo chhin chhiah sak tawh a.   Tunlai thiamna hmanga Sial chhinchhiah anih vang hian Sial 300 zet vulhtute zinga inchuh buaina awmfo thin pawh a reh phah ta a ni.