India Zalenna champha vawi 52 na chu Kolasib a Tumpui Field ah ropui taka lawm a ni a. Chawhma dar 10 khan Transport Minister Pu P.C.Zoramsangliana chuan Hnam puanzar pawtpharhin zalenna lawmna parade chibai a chhanglet a ni.

Thuchah sawiin Pu P.C.Zoramsangliana chuan, Prime Minister thil ti thei Dr.Manmohan Singh-a kaihhruaina hnuaiah India chu khawvel mite zah leh hriat, mi rethei thleng phak hmasawnna kalpui mektu a ni, a ti a. Tuna Pu Lal Thanhawla hruai sorkar chu Election Manifesto a a intiamna ti hlawhtling tura theihtawp chhuahtu a ni, tiin NLUP hmanga a hmachhawpah leh thildangah chak takin ke a pen mek a ni, a ti.

Minister chuan, thalaite khawvel thar a tan sorkarin Games & Sports leh Fine Art ahte hma a la nasa a ni, a ti a. Rajiv Gandhi Stadium chu Mualpuiah hna tan tawhin India ram leh ram pawnah thalaite tirh chhuah mek zel an ni, a ti a. Education Reforms Committee din niin, Lord Krishna IAS Academy N.Delhi nen tangrualin Mizoram Youth Commission chuan April 09 khan Civil Services Coaching Aizawl ah a tan ta a ni, a ti bawk a. Tuirial Hydel Project tihthar leh mek a niin Bairabi,Tuivai leh Kolodyne tepawh chak taka bawhzui an ni a, Bairabi-Sairang rel kawng (Broad Gauge) atan pawh hna chhunzawm vat tum a niin Bairabi-Sairang inland Water Transport atan Ministry atangin pawisa tun atanga hun reiloteah nuai 300 chuang hmuh a ni dawn a ni, Pu Ramsanga chuan a ti bawk. Kolasib District chu ei leh bar kawngah potential district an nih anga dik taka thawk turin a duh thu pawh mipuite a hrilh a ni.

Kolasib Independence Day lawmna ah hian Contigent 17 in March Past an entir a. Minister nupui Pi Lalthlamuani chuan Home hrang hrang, Blind School, Enna In, TNT, District Jail, Gosen Special School, Audrine Scism Children Home, MC Home, Davids Team District Hospital leh Nazareth Hospital hnenah thilpek he hunah hian a hlan bawk a. Independence Day Celebration Committee in tanpuina sum heng home ahte hian an hlan bawk.

March Past lawmman latute chu Uniformed ah I-na Guides, St.John’s Higher Secondary School, 2-na Mizoram Excise leh 3-na NCC Junior Division, St.John’s HSS an ni a. School Contigent zingah I-na C.Z.Higher Secondary School, 2-na St.John’s Higher Secondary School leh 3-na JNV te an ni.