India zalenna champha vawi 65- na chu vawiin khan Kolasib Tumpui field ah ropui taka lawm a ni a. Food & Civil Supplies Minister Pu H. Rohluna chuan hnam puanzar pawtpharhin Parade chibai a chhang a. Thuchah sawiin hmasawnna hna tluang taka thawh a nih zel theih nan Remna leh Muanna kan neih hi i vawng him zel ang u, a ti.

Pu Rohluna chuan kawng hrang hranga ram tana sawrkar thiltih thenkhat tarlangin Sawrkar flagship programme NLUP thawkkhatnaah chhungkaw 45000 chuang hnenah bul tanna sum sem a nita chu a lawmawm takzet a ni, a ti a. Mizoramin buh leh bal tharchhuah kawnga hma kan sawn theih nan thlai chi tha leh Khawl te loneitute hnenah pein Tui kawng siam leh leilung buatsaih hna te nasa taka thawh a ni a. Buh mamawh zat 25%  vel chauh kanla thar hrih avangin Civil supply kaltlanga ei tur chawkluh danah sawrkarin nasa takin tan a la a. Fur laia kawng chhiat zualna Supply Centre ahte chuan buhfai chhek ngah tawh an niin mipui tan thlaphanna tur a awm lo a ni, a ti. LPG lamah pawh Mualkhang leh Borkhola (Silchar) Gas Bottling Plant te chu tichak turin khawl thar bun fel diam an ni tawh tih sawiin RGGLV hnuaiah LPG Agent thar tur khaw 12 –ah kumin chhung hian thlanfel an ni tawh, a ti.Pu Rohluna chuan khawpui chhung leh thingtlanga cheng mi harsa te dawmkang turin sawrkar chuan a tha a thlah lova. Aizawlah rethei In neilote tan In sak mek a ni a, nikum chhung khan thingtlanga cheng 4245 hnenah In sak tanpuina IAY a pe a, rangva inchung tur chhungkaw 3000 hnenah a sem bawk , a ti. Power lama hma kan sawn theih nan chak taka hma lak mek a ni tih sawiinTuivai Hydro Electric Project (210 MW) chu thawh theih tura tender chhuah tawh a ni a,Tuirial  (60MW) hun rei tak hlamchhiah tawh chu tharthawh leha hna thawh mek a niin Kolodyne HEP(460MW) pawh chak takin NTPC in an thawk a. Project dang dang thawh mai tur a awm bawk a ni, Pu Rohluna chuan a ti bawk.

Hmasawnna hna dang thawhte Kawngpui tha, Zirna,Sports leh Industry lamte sawiin zirna lamah chuan NIT le IIMC ah te pawh class tan a nita tih Minister chuan a sawi a. Kolasib – Aizawl MST Bus pawh naktuk atanga tlantir a ni dawn tih a sawi bawk ani.

Pu H. Rohluna hi a nupui Pi Lalbiaknii’n a tawiawm a ni.

Independence  Day lawmnaah hian lawman chi hrang hrangte Khuallian hian a sem a.March past entirtu lawmman hmutute chu :Uniformed zingah 1-na Ist IR Bn, 2 na Mizoram Excise, leh 3-na SJHSS an ni a. School contingent zingah chuan 1-na Hmar Veng H/S 2 na Diakkawn H/s leh 3-na HT Comprehensive H/s te an ni.I-Day lawmna pual hian Middle school naupangte tan Painting competition neih a ni a. Lawmman 1-na Lalremruata,(14) Cl VIII,Govt. Chawngfianga M/S, 2- na Lalngaiha,(14) Cl-VIII Govt. M/S leh 3-na C.Lalhmingfaka (12) Cl VII, Tumpui M/S te an ni. I-Day puala Volley Ball  ( Men)-a 1 -na chu Kawnpui chhim veng an ni a.Volley Ball (Women)-a I-na latu chu PK. Volley Ball Club, Kolasib an ni.

Independence Day puala Home leh Jail te tanpuina tura Department  hrang hrangte pawisa thawh tling khawm chu Zirtawpni kalta khan hlan alo ni tawh bawk a ni.