Vawiin khan Kolasib DC Conference Hall-ah kum 2012 atana Independence Day Celebration Committee chu an chairman Pi Niharika Rai, IAS, Dy. Commissioner hovin neih a ni a. Kumin Independence Day chu ropui leh felfai thei ang bera lawm nise an ti.

Pi Niharika Rai chuan Independence Day chu ropui leh kokim taka lawm a duh thu sawiin khua leh tui kan nih anga phur taka kal vek tura sawrkar hnathawkte phei chu a beisei thu a sawi a. State sawrkara Minister-in a rawn hmanpui tur thu leh hemi ni hi chuan khawtlangah programme dang awmlo se a duh thu pawh a sawi a ni.

Independence Day Ceremonial function chu zing dar 10:00-ah Tumpui playground-ah lawm tura rel a ni a, Sawrkar Officer leh an hnuaia hnathawk zawng zawng te chu he hunah hian kal vek tura tih an ni a. Sawrkarin Khuallian tura a ruat Minister thusawi ngaithla-a a lawmna hun hmang tur hian mipui zawng zawngte Committee hian a sawm a. Tlawmngai pawl leh Kohhran hrang hrangte chu he ni hi chuan eng programme mah a hranpa-a siam lo turin a ngen bawk a ni.

Independence Day lawmna hi VIP At Home in zuiin Circuit House, Banglakawn-a neih turin Committee chuan a rel a. I- Day lawmna pual hian Photo Exhibition leh skul naupang pual Painting Competition buatsaih turin Committee chuan a titlu a. Kum danga tihdan thin angin Home hrang hrangah thilpek hlan leh a ni ang a, Sports tournament Football (men) leh Volley Ball (women) pawh buatsaih a ni ang a, hemi bakah hian Kolasib Town Zone Association in he ni denchhena age group football tournament an dilna pawh remtihpuiin DSYO leh SSA ten hemi atan hian hma lo la se, tiin an rel bawk a ni.

Committee-ah hian Department hrang hrang mawhphurhna pawh siamfel nghal a ni.

Attachment

  • Loading attachment...