Space Application Centre, Ahmedabad leh Mizoram Remote Sensing Application Centre (MIRSAC), Directorate of Science & Technology, Mizoram tangkawp buatsaihin vawiin nileng khan I&PR Conference Hall-ah Hmarchhak State University te tana Project ruahman dan leh an siam dan tur te entirna leh sawihona an nei. Project te hi pawm a nih chuan Rs. Nuai 10 atang Rs. Nuai 30 thlengin Indian Space Research Organisation (ISRO) chuan a pe thei dawn a ni.
He inkhawmah hian Dr. R.K. Lallianthanga, Project Director, MIRSAC chuan inlawmna thu sawiin hetiang RESPOND meeting hi Mizoramah a vawi khatna a ni a, University hrang hrang ten an sawtpui ngei a beisei thu a sawi. University aiawh a lo kal khawmte chu ram leh hnam thatna tura Project siam turin a ngen a, rilru tak tak seng turin a chah bawk.
Interest Exploration Meeting ah hian Dr. Ajai, Chairman, Respond Review Committee chuan Indian Space Research Organisation (ISRO) kalhmang leh he RESPOND programme in a tum te a sawi a. India hi thlalem siamna kawngah hma a sawn chak hle a, Remote Sensing thiamna hmanga hmasawnna tluantling nei turin University a mithiamten ngaihtuahna tak tak senga ruahmanna siam turin a sawm a, Project pawh tha tak siam turin a ngen nghal bawk a ni.
Pu R.P. Dubey, Group Director, PPG, Space Application Centre (SAC), Ahmedabad pawhin thu sawiin thiamna chi hrang hrang hmanga zir bingna neih hi ram tan a tul tawh a, chutiang atan chuan SAC hian ISRO hnuaiah project thahnem tak a kalpui mek a. India Hmarchhak a awm ten chutiang project te chu siam a tangkai taka hmang turin a chah bawk.
Thusawitu dang Pu Vikas Patel, Head RRCD, SAC, Ahmedabad pawhin he RESPOND programme in a huam theih chin leh hmalak dan tur te a sawi a. Project siam dan tur te leh kalpui dan tur tlangpui a sawi hnuah he inhmuhkhawmna hi tangkai taka hmang turin kalkhawm te chu a ngen nghal a ni.
Hemi hnu hian University hrang hrang atanga lo kal chuan an hmalak dan leh project an thehluh tura an ruahmannate Power Point hmangin an entir a. Sawihona hun hman a nih hnuin Pu R.P. Dubey chuan lawmthu sawiin inrawnkhawmna hun hi a khar a ni.
