Vawiin khan Kolasib Sports Stadium ah India zalenna cham vawi 72 na chu Mizoram Legislative Assembly Speaker Pu Hiphei chuan Dar 10:00 AM ah hnam puan zar pawt pharh in a hman pui.

 

Khuallian chuan  India tan ni ropui tak leh ni chhinchhiah tlak India ramin zalenna a neih vawi 72-na lawmna niah hian Kolasib mipui zawng zawngte chibai a buk a

He huna kal khawm te hian India ram zalenna atana inpe zo Pu Mahatma Gandhi leh a thuaihruaite, Pandit Jawaharlal Nehru, Sadar Vallabhai Patel, Maulana Abdul Kalam Azad leh mi huaisen nunna hlan ta te kha i hre chhuak thar leh ang u tiin Anmahni avang hian tun dinhmun hi ka thleng thei ta a ni a ti.

 

Kan hruaitu hmasa ten dan rorelna fel fai tak an lo duan tawh avangin khawvela Democracy ram ropui ber niin a ram mipuite thlamuang takin kan awm thei a Economic lam nise India ram chu khawvela thang duang ber pawl a lo ni ta, ei leh bar intodelhna kawngah pawh hma kan sawn chak hle a ni a ti bawk.

 

Speaker chuan kan ram neih chhun Mizoram hi a tha bik a, tun dinhmunah phei chuan India a state ralmuang ber hial kan ni a, Mizoram hi lum lutuk leh vawt lutuk avanga thihna awm ngai lohna ram, air condition ngai lova tui taka kan muthilh theihna ram ani tiin, A ram leilung hi thei leh thlai chi hrang hrang ten an ngeih em em bawk a. Ram duhawm tak nei reng chung sia mipuite rethei taka an awm hi a khaichhuah nan kan Chief Minister Pu Lal Thanhawla kaihhruai sorkar chuan NLUP an duang chhuak hi a lawmawm hle a, sawiselna tam tak karah a hlawhtlinna kan hmuh chho zel a, NLUP hmanga eizawnna nghet nei a, mahni kut kea ding ta an awm nual tawh a ni a ti bawk.

 

Khuallian chuan NLUP hi miretheite chawikanna atana duan a ni a, India ram mai nilovin U.N.O. hriat pawh hlawh phak a ni a, khawvel pum huapah pawh he NLUP hian tha tih a hlawh hle a ni tiin Hemi nena kalkawp tur hian Sawrkar-in NEDP a duang chhuak leh a, NEDP hi chu tanpuina mai a ni tawh lova, mipuite mamawh intawm chhawpchhuahna a ni a ti a. Hei hian mamawh intawm - Link Road, Green-house, Khelmual tha, etc., mipuite hnenah pek a tum a Hei hi mipuite nena tangruala tih puitlin chi a ni tiin chu tanrualna chuan tun aia dinhmun sang zawk ah min hlangkai thei a ,He policy hian tun hun mai nilo, hun lo kal zel tura Mizoram Economic dinhmun siam that leh tih nghel ngeh chu a tum a ni a ti. Ram tha tak neiin mihring heti zat hi kan awm a, a leilung hausakna leh tangkaina phawrh chhuak tur hian he policy hi a pawimawh hle a ni. He policy hian miretheite dawm kan mai bakah kan ram dinhmun chawisan a mahni ke a ding thei tura Mizoram hi buatsaih a tum a, Kan ram chhunga Department hrang hrang leh sector hrang hrang te rualkhai taka kal tir leh ram tana a hlawk thei ber tur anga hma lak a tum a ni tiin khuallian chuan a sawi bawk a ni.

 

Khuallian hian parade contingent hrang hrang ina Hnam Puanzar chibai an buk chu chhanglet in Armed Contingent (1st IR Bn, Mualvum) pakhat an awm a, Un-Armed Contingent atangin Scouts & Guides Govt. Diakkawn High School chu pakhatna niin, NCC Girls St John's HSS chu pahnihna an ni a, Scouts & Guides St John's HSS chu pathumna an ni. School Contingent atangin JNV School Thingdawl chu Pakhatna niin, Govt CZ HSS chu Pahnihna an ni a, DIET Kolasib chu Pathumna an ni.

Attachment

  • Loading attachment...