Ram chhung hmun dangte rualin India-in zalenna a hmuh champhaphak Vawi 72-na chu vawiin chawhma dar 10 khan Mamit GSA Playground-ah ropui  taka hman a ni a. Pu Lalsawta, Hon'ble Minister, Finance, Planning, Law & Judicial, Taxation chuan khuallian ni-a hmanpuiin Parade Contigents 17 te hnam puanzar chibai buk a chhang let.

Khuallian Pu Lalsawta chuan kan ram ropui tak Zalenna Ni-ah Mamit District mipui zawng zawngte chibai a buk a. Kum 71 lai mai mahni-a inrelbawla kan ram zalenna tura sul lo sutute kan rilruah hre tharin zahna chibai buk thar theuh turin kalkhawm mipuite a sawm a ni.

Khuallian chuan Mamit District hmasawnna leh ram chhung hmasawnna hrang hrang tarlangin NLUP kaltlangin mi harsa zawkte'n leirem an rah theihna turin kan Sawrkar chak tak hnuaiah mi tam tak khaichhuah an lo ni tawh a. NEDP hnuaiah theihtawpa hmala a tangte tanpuina turin hma laksak mek a ni a. Thlai tharchhuak tam tura hmalaknaah Agriculture link road Km 57 laih zawh tawh a ni. Mizoram Sawrkar chuan kawngpui sial hna a thawh mekah National Highway 44A zawh tawh niin kum 2019-ah chuan a zavaia zawh hman tum a ni. Hei bakah hian PMGSY hnuaiah Mamit to Phaizau kawng 5.150 laih zawh tawh a ni a. District chhung inkalpawhna kawngpui hrang hrangte siam that leh sial hna thawh chhoh mek a ni bawk.

Agriculture Department hnuaiah chu lo neitute nen tangrualin chak taka hmalak a ni a.Venhimna lam hna thawktu District Police-te chuan ruihhlo dona kawngah chak taka hma lain ruihhlo chi hrang hrang tam tak man a ni a. MLPC Act hnuaiah Case 29 Register niin mi 35 man an ni. Ramri venhimna kawngah chak taka hmalak ni bawkin mipuite him leh thlamuang taka kan awm theih nan chhun leh zante Patrolling neih thin a ni a. Hei hian rah tha tak a chhuah thu a tarlang a ni. District Court hnuaiah August 2017 leh 26th July, 2018 chhungin Criminal Case 453 ziah luh a ni a. Chung zinga Case 351 chu chinfel tawh a ni.

Mipuite hriselna chu Sawrkar ngaihpawimawh ber a nih avangin Mizoram tana mellung ni turin thla hmasa khan Falkawnah MiMIR Medical College, zirlai 100 awm theihna tur a hawng a. Tunah hian zirlai 87 an awm mek a ni. Hei hian zoram chhunga Doctor indaih lohna a phuhruk a beisei thu a sawi. Mamit District Hospital chu kawng hrang hranga thuam that a ni a. Khawl changkang tak tak lei thar niin heng khawlte chhum lo chat lova chawm turin NEDP Scheme atangin Generator lian chi (500 KVK) lei a ni. NEDP kaltlangin khawl leh hmanraw chi hrang hrang 83 lei a ni bawk. Mipuite ei leh bara kan buai lohna turin October 2018 thleng daih tur buhfai chhekkhawl tawh a nih  thu a sawi a ni.

Zirna lamah Mamit District chuan hma a sawn hle a. Result chhuak hnuhnung berah Mamit College chu Mizorama College ti tha 7-na a nih thu tarlangin Education Subject bikah R. Lalruatfeli D/o R. Lalhmangaiha chu Mizoramah 1-na a ni pha hial chu lawmawm a tih thu a sawi a. RUSA kaltlangin thuam that mek niin India rama College hrang hrang zinga Model College tura thlan zinga a tel chu lawmawm a tih thu a sawi bawk. RMSA & DEO hnuaiah High School thar 12 sak zawh tawh a ni a. SSA Mission hnuaiah Rs. 47 lakh sengin School building chhe tawh 14 sak that a ni. Tunah hian Rs 55.44 lakh sengin School chhe tawh 16 thawm that hna kalpui mek a ni.

Mamit District chu India ram District hnufual chawikan ngai zinga thlan tel a nih avangin hriselna, zirna, mipui ei leh bar zawnna kawngah  te Department hrang hrang atangin hmalak chhoh mek a ni.

Khuallian chuan Mizoram chu kum 1987-ah State a puan kan ni a. Kan thenawm State keini aia State ni hmasate la um pha chiah lo mahila Mizoramin hmasawnna lawmawm tak tak a hmuh chhoh mekah lawm nachang hria a, kohhran, tlawmngai pawl leh pawl hrang hrang, thuthar thehdarhtute nen tang tlanga hnam inpumkhatna leh inunauna vawng nung zelin india ram leh mizoramin hma a sawn a, kan tu leh fate tana chenna tlak leh chhenfakawm ram siam tura theihtawp chhuah turin he Ni hmang tura kalkhawm mipuite chu a sawm a ni.

Vawiin India Independence Day Mamita hmannaah hian Parade contigents, Armed Contigent 1, School Contingents 16 leh MZP Pipe Band 1 awmin Parade Commander hi Inspector Lalthansanga, 4th IR Batallion a ni a. Second Commander hi SI. Lalsangliana a ni. School contigents-ah hian pakhatna hi Presbyterian English School, Girls Contingent niin pahnihna hi New Diamond School, Girls-te an ni a. Lawmman pathumna hi JNV School-te an ni.

Khuallian hian India Independence Day pual hian Mamit District Hospital-a damlote tlawhin  Mamita Home hrang hrang Buannel Childrens Home, Observation Home leh Joshua's Childrens Home te tlawhin thilpek a pe a, hei bakah District Jail-a tlawh bawk ni.

Khuallian Pu Lalsawta hian Mamit District  Bawrhsap Complex-a Mahatma Gandhi lim chu zahna chibai a buk a, Sawmbikte pualin D.C Complex ah VIP At Home buatsaih a ni.

India Independence Day, Mamit khelmuala lawmna pual hian District huap infiamna chi hrang hrang Football, Volleyball leh Badminton-ah te intihsiakna buatsaih a ni bawk.