1807/2026-2027

Kolasib, 15th August, 2026:  Tukin zing dar 8:00 khan Kolasib Sports Stadium-ah India Independence Day vawi 80-na chu ropui taka lawm a ni a. He hunah hian Pu K Sapdanga, Home Minister chu Khuallian  niin, hnam puanzar a pawtpharh a, parade contingent 19 te chibai buk a chhang let a ni.

Khuallian, Pu K Sapdanga, Home Minister chuan Independence Day thuchah sawiin, kalkhawmte zalenna chibai a buk a. Zalenna hlut zia sawiin, mipuite chu anmahni zalenna an humhalh mai bakah, mi dangte zalenna pawh zahsak tawn theuh turin a chah a ni.

India sawrkarin 'Viksit Bharat 2047' kaltlanga India ram chu ram hmasawn (developed country) a hlan kai tumin ngawrh takin hma a la mek, a ti a; he hmachhawp tihlawhtling tur hian India rama state tin, district tin leh mimal tinte kan pawimawh vek a ni, a ti. Mi ruala ke pen ve turin mahni theihna zawn theuhah tan la thar turin mipuite chu a fuih a, Kolasib chu Mizoram luhka a nih angin kawng hrang hrangah a pawimawh hle tih sawiin,  hmasawn a, thanglian zel turin  duhsakna a hlan bawk a ni.

Home Minister hian Kolasib District hmasawn nana kawng hrang hranga thawktu zawng zawng te duhsakna leh zahna chibai bukin, kum 2025-2026 chhunga Department hrang hrang kaltlanga sawrkarin Kolasib District hmasawn nana a hmalakna hrang hrang langsar zualte a tarlang nghal a. Chung Department hmalakna te chu a  hnuaiah hian a link dah a ni.

https://dipr.mizoram.gov.in/post/independence-day-2026-kolasib-sports-stadium-k-sapdanga-home-minister-mizoram

Kumin Independence Day parade-ah hian contingent 19 an tel a.  Armed Contingent 1, Unarmed Contingent 5, School Contingent 12 leh Pipe Band 1 te an ni. Parade Commander hi S.I. Saizika niin, 2nd Commander chu S.I. Malsawmdawngliana a ni.

Kolasib a Independence Day lawmna pual hian intihsiakna hrang hranga lawmman te sem nghal a ni a, team titha te chu hengte hi an ni:

Parade Contingents:

Unarmed Contingent

1-na Govt. Kolasib College NCC

2-na Govt. Diakkawn HSS NCC Army, 3-na St. Johns HSS Army Wing.

School Contingent 

1-na DIET Kolasib, 

2-na Govt. C.Z. HSS, 

3-na JNV Thingdawl.

Infiamna

Basketball: Champion - Venglai BSA, Runners-Up - Flying Foxes.

Football (Veteran Team): Champion - Venglai VC, Runners-Up - Project Veng, Fair Play - Project Veng.

Football (1st Division Team): Champion - Venglai FC, Runners-Up - Grassroot Kolasib, Fair Play - Grassroot Kolasib.

Infiamna lawmman hi Pu Lalfamkima, Deputy Speaker Mizoram Legislative Assembly chuan a hlan a ni.

Kolasib Sports Stadium-a Independence Day lawmna hun hman zawh a nih hian DC Bungalow-ah sawm bikte tan 'At Home' programme hman zui nghal a ni.