Mizoram hmun dang rualin vawiin khan Kolasib ah pawh Farmer's Day Kut Hnathawktute Ni chu Diakkawn YMA Hall ah hman a ni a, he hun hi Finance Minister Pu Lalsawta'n a hmanpui a ni. Minister hi Finance Secretary Pu Vanlalruata leh Commissioner of Taxes Pu K. Sanglawma ten an tawiawm a ni.
Finance Minister Pu Lalsawta chuan NLUP chu tanpui ngaite tanpui tur atana ram hruaitu ten mithiamte rawn chunga an ngaihtuahna leh an rilru senga an duanchhuah programme a ni a, NLUP tanpuina hi tanpuina sathliah mai ni lovin tang tura puihna a ni, a ti a. Mizoram chu lei hausakna leh leilung behchhana hma kan lak loh chuan kan hausa thei dawn lova chuvangin ram hausa ni tur chuan kut hnathawktute hi in pawimawh em em a, a bulthum in ni a, America ram ropuina pawh an kut hnathawktute vang a ni a, Mizoram ropuina chu in kutah hian a innghat a ni tiin a fuih bawk.
Pu Lalsawta chuan Mizoram hi ram nuam tak, boruak, sik leh sa tha tak nei leh remchanna ngah a ni a, Mizo te hi kan nep lova, thil engkim hi kan thiam chak a chuvangin ngaihtuahna in hma a hruaia, kan hma thlir kan tih zauva tih takzeta hma kan lak theuh chuan hlawhtlinna kan nei thei a ni, a ti a. Tharchhuah tihpun leh peipun kawnga contract farming, public private partnership leh co-operative society te tela hma kan lak thiam chuan tun aia nasa leh zawka hlawhtlinna kan neih ka theih ring a ni, a ti a. Minister chuan mi tumruh te chu harsatna in a hneh theih loh thusawiin rinawmna, taimakna, thahnemngaihna leh tih tak zetna nen tha thlah lova tan la zel turin he hunah kut hnathawktu kalkhawmte chu a fuih bawk a ni.
Inlawmna thu sawitu Kolasib DC Pu H. Lalengmawia, IAS chuan mi hlawhtling leh mi ropui ten thil a eng zawngin an thlira, mahni inrintawkna an nei a, an tum a ruh a, an thawkrim a, an mahni an in thunun thiama, hengte hi mihring tupawh in kan nei a, heng hlawhtlinna thuruk mitina awmsa kan hman thiam chuan hlawhtlinna kan nei thei a ni tiin kut hnathawktute hi a fuih a. Kolasib District-a lo nei leh kut hnathawktu te chuan Mizoram District dang aiin remchanna an neih tam zawk avangin Mizoram hmun danga lo nei mi te tan entawntlak model ni turin an hmalakna theuha inpekna thar nen thawk turin a chah bawk a ni.
He hunah hian NLUP Nodal Officer leh Addl DC ni bawk Pu R. Lalremsanga chuan Kolasib District chhunga NLUP thlen tawh chin 'Achievement Report' a tarlang.
Finance Minister Pu Lalsawta hian NLUP Line Department 8 tena NLUP lama ti tha Best Beneficiary leh Most Promising Farmer mi 13 hnenah lawmpuina thuziak a hlan a, Agriculture leh Horticulture Department hnuaia NLUP 3rd Phase leh 4th Phase beneficiary-te NLUP tanpuina sum a hlan bawk a ni.
Kolasib District ah hian NLUP beneficiary 11372 an awm a, hengte hi Ist Phase ah mi 3797; 2nd Phase ah mi 3991; 3rd Phase ah mi 2441 leh 4th Phase ah mi 1167 an ni a. Agriculture Department hian beneficiary 1778; Horticulture Department in beneficiary 1955; AH& Vety. Department in beneficiary 2471; Enviroment & Forests Department in beneficiary 126; Fisheries Department in beneficiary 513; Sericulture Department in beneficiary 194; Soil & Water Conservation in beneficiary 2673 leh Industries Department in beneficiary 1662 te an nei a ni. Ist Phase leh 2nd Phase a beneficiaries zawng zawng te hi tanpuina sum a kimin pek vek an ni tawh a, 3rd leh 4th Phase ah Department thenkhat ten tanpuina Ist leh 2nd instalment pein, instalment dang pek an la hma bak a. Environment & Forests Department leh Fisheries Department ten chuan Phase zawng zawnga NLUP beneficiary te tanpuina sum an pe vek tawh a ni.
