Vawiin khan Kolasib Brig. C.Vankunga Shopping Centre ah Ni thum awh tur MAHCO huaihawt Kolasib Special Handloom Expo chu Bawrhsap pu Zoengsanga’n a hawng.

Hawnna inkhawm kaihruaitu Pu Lalrinawma Pachuau, Project Manager, MAHCO chuan handloom Expo chu Mamit, Lunglei leh Lawngtlai ah huaihawt a nih tawh thu tarlangin, Kolasib Expo ah hian Society hrang hrang hnuaia inziaklut Aizawl leh Thenzawl atangin Stall 13 an hawng tih a tarlang bawk a ni.

Khuallian Pu Zoengsanga, Kolasib Bawrhsap chuan Mizo ten kan thil ngaihhlut leh ngaihsan zawng (value system) chu a inthlak nasa hle mai a, western culture kan um chak lutuk a, hei hian kan nitin nuna kan ngaihhlut tur kan hnam zia rang leh incheina te hi min ngaihhlut loh tir a, kan hnam rohlu heng kan hnam zia rang leh incheina te hi kan ngaihsan thar a tul ani a ti a. Kan hnam rohlu te hi keimahni’n kan hlut loh chuan midangin min hlutsak dawn lova kan hnam thil te chu kan thehlar zual deuh deuh a ngai ani a ti. Mi ram incheina kan la (copy) chak lutuka, kan inngaituah thar a hun a ni tiin MAHCO Handloom Expo chu harh thar nan hmang ila Hnam dangte entawn tlak khawpa kan hnam incheina te hi kan ngaihsan zia kan tihlan a ngai ani ati a, Expo chu hlawhtling taka kalpui a nih theihnan duhsakna a hlan bawk a ni.

Handloom Expo hi Shopping Centre Buildinga UD&PA Conference hall ah buatsaih niin Mizo incheina chi hrang hrang bakah bag, handbag leh thidang te zawrh ani a, March ni 29 thleng hawn ani ang.