Vawiin khan District Tobacco Control Cell (DTCC) buatsaihin Lunglei I&PR Conference Hall-ah zuk leh hmuam chungchang inzirtirna hun ‘TRAINING ON TOBACCO CONTROL FOR MJA AND I&PR’ neih a ni. Training-ah hian Lunglei DIPRO Pi C. Lalremruati leh I&PR  Department-a thawkte leh Lunglei chanchinbumi thahnem tak an kalkhawm.

Training hi Dr SR Ngurchamliana, Medical Superintendent cum DNO, NTCP in kaihhruaiin ‘Health Effects of Tobacco’ tih thupui hmangin zirtirna a pe a. Global Adult Tobacco Survey (GATS) in a chhut danin Mizoramah mi za zela 58 (58%) te chu zuk leh hmuam ti thin (tobacco users) niin India ram pumah zuk leh hmuam ti thin tamna ber dawttu State (1-na Tripura) kan ni a. Vaihlo hman thin avangin mizo mipui tam takin hriselna lamah harsatna nasa tak an tawk mek a ni tiin Drugs, zu, AIDS, kangmei, tualthah,mahni in thah leh motor accident a thi zat belhkhawm  ai in Vaihlo hman hian mi a suat hnem zawk a ni a ti a. Vaihlo zuk leh hmuam hian kan lu chip atanga kan ke ler thleng harsatna min siam sak thei a, heng natna khirh tak tak - cancer chi hrang hrang, chuap thalo, lung thalo, thawhhah (Asthma), TB te mai bakah hmeichhe nau pai tan nau chhiat, nau piang hlim zang lutuk, nausen chhan hriatloha thih thutna te leh nausen thla kim lova piang ang chi te hio a thlen a ni, a ti. Cancer chi hrang hrang ah India rama pakhatna kan nihna pawh tarlangin hengte:

Cancer zawng zawng belhkhawm ah (Mipa & hmeichhia)
Hrawk & hnar cancer/ Nasopharynx Cancer (Mipa & hmeichhia)
Chuap Cancer (Mipa & Hmeichhia)
Pumpui Cancer (Mipa & Hmeichhia)
Chhulhmawr cancer (Hmeichhia)
Thisen cancer chi khat / Myeloid leukemia (Mipa)
Chaw dawt cancer (Mipa)

Dr SR Ngurchamliana chuan I&PR leh Media-te chu kawng hrang hranga mipui zirtirtu leh Awareness thehdarhtu pawimawh tak an nih avangin zuk leh hmuam dona kawnga hmalaknate a zau thei ang bera thehdarh sak thin turin a  sawm a ni.

Vawiin program ah hian Vanlalruata, Social Worker, NTCP lunglei in report pe in Dr Lalnunsiama Renthlei, District Consultant NTCP in COTPA chungchang zirtirna a pe a, Sylvia Zomuanpuii, Psychologist, NTCP Lunglei-in Tobacco Cessation tih thupui hmangin zirtirna a pe bawk.

District Tobacco Control Cell kaihhruaina hnuaiah vaihlo do kawngah chak taka hmalak zel a ni a. April 2018 atanga February 2019 thleng khan District chhungah Squad Drive vawi 64 neih tawh niin School hrang hrang ah Awareness Campaign vawi 58 neih tawh a ni a. Training vawi 9 buatsaih tawh niin Vaihlo nghei tum Patient mi 420 an enkawl tawh bawk a ni. Vaihlo zuk leh hmuam sim duh te tan Lunglei Civil Hospital Room No 11 ah ‘Tobacco Cessation Clinic’ a awm a. He clinic hi Monday to Friday (9:30 AM – 3 PM) leh Saturday (9:30 AM – 1 PM) Doctor leh Psychologist ten an thut chilh rengin a thlawnin Nicotine Replacement Therapy an tih sak thin a ni. District Tobacco Control Cell (DTCC) te hi thalai pawl, school leh a duh apiang te tan program nei turin engtik lai pawha sawm theih niin a thlawnin program an buatsaih sak thin a ni.