1879/2023-2024

2023 Mimkut thla ni 14: Sawrkar laipuia Ministry of Home Affairs-in mi huaisen, mi dangte nun chhan nana mahni nunna thapa che chhuakte chawimawina, Jeevan Raksha Padak Award 2022 hnuaia chawimawina chi khat, Uttam Jeevan Raksha Padak dawng tura a thlan, Kolasib District chhunga mi, Pu Lianzalama, Kolasib Diakkawn leh Pu Lalchhuanliana (L), Kolasib Diakkawn te hnena chawimawina hlanna hun chu vawiin khan Kolasib DC Conference Hall-ah buatsaih a ni.

He hun hi Kolasib Bawrhsap Pu John LT Sanga chuan kaihruaiin, Jeevan Raksha Padak chawimawina chungchang leh kumina Mizoram aṭanga dawngte a tar lang a. Kum 2021-a Kolasib-a vanduaina runthlak tak thleng khan ram mipuite kan thin a ṭhawngin, a pawi kan ti a, vanduaina tawkte kan tuarpui tak zet a ni, a ti a. Vanduaina kara Mizo tlawmngaihna lo lang chhuakah ṭhian chhan thih ngam lu pu an lo zuang chhuak kha a ropuiin, an chhuanawm em em a, chu huaisenna rah chhuah chu vawiina Kolasib District-ah huaisen chawimawina hlan tur mi pahnih kan neih phah a ni tiin, huaisen chawimawina dawngtute zahna chibai a buk a ni.

Kolasib District aṭanga he chawimawina dawngtu Pu Lianzalama, Kolasib Diakkawn chu Bawrhsap Pu John LT Sanga'n he chawimawinain a ken tel medal leh certificate a hlan a. Pu Lalchhuanliana (L), Kolasib Diakkawn chawimawina dawnin a ken tel medal leh certificate chu a nupui, Pi Zachhingi hnenah Kolasib District Sr Superintendent of Police Pu Lalrinawma Traite chuan a hlan thung a. Chawimawinain a ken tel pawisa erawh chu a dawngtute account-ah Ministry of Home Affairs-in an lo thun tawh a ni.

Kum 2021 August ni 27 (Zirtawpni) tlai khan Kolasib Diakkawna Pu VL Siama Parte fapa pathum, Albert Vanlalhriata, (40), Andrew Vanlalhruaia, (40), leh William Lalduhawma (35) te unau chuan an in rel mek hnuaia an tuizem an tihfainaah vanduaithlak takin nunna an chan a. Tuizem chhunga an chetsual thu hriat a nih veleh mi tlawmngaite'n anmahni chhanchhuah tuma hma la nghalin, Pu Lalchhuanliana (60), Kolasib Diakkawn Salem Venga mi Bazar kal haw pawh chuan ṭanpui ngai an awm tih hriain, buaipui turin tuizem chhungah chuan a lut ve a. Hetia mi nun chhan nana a chet chhuahna lamah hian che sual vein, District Hospital Kolasib panpui a nih hnuah a nun a chan zui ve ta a ni. Pu Lalchhuanliana (L) hi sipai bang, pa tlawmngai tak a ni a, mi dang chhan a tumna lama a nun a chan avang hian Uttam Jeevan Raksha Padak award hi hlan a ni.

He thil thlengah vek hian a hun laia Kolasib Vengthara khawsa, Pu Lianzalama chu mi tlawmngai che chhuakte zingah tel vein, tuizemah hian a lut zui ve a. Tuizem chhunga chesual mi pali zinga pahnih chu tuizem chhung aṭanga a lak chhuah hnuah amah pawhin thawk a harsat tak avangin pawn lamah an pawt chhuak a, nikhaw hre lova awm zuiin, a nunna a chan phah ve ṭep nghe nghe a. Vanneihthlak takin ani erawh chu a dam chhuak ta hlauh a; hetia mi dang chhan nana a nunna thapa a chet chhuah avang hian Uttam Jeevan Raksha Padak award hi hlan a ni.

Vawiina huaisen chawimawina inhlannaah hian chawimawina dawngtute leh an chhungte bakah, sawrkar official-te, khawtlang hruaitute, tlawmngai pawl ai awhte leh District MJA te an kal khawm a. Kolasib Sub-Deputy Commissioner Pu Gilbert Lalhlimpuia'n chawimawina dawngtute chanchin leh chawimawina an dawn chhan tar langin, chawimawina dawngtute leh an chhungte aṭangin thu sawi ngaihthlak a ni a. Mizoram Upa Pawl (MUP) Kolasib District Headquarters President Pu C. Lianzuala'n ṭawngṭaina hun hmangin, Mizo Hmeichhe Insuihkhawm Pawl (MHIP) Kolasib Sub-Headquarters, Young Mizo Association (YMA) Kolasib Diakkawn Branch leh Village Council Kolasib Diakkawn ai awhte hnen aṭangin thu sawi ngaihthlak a ni bawk.

Jeevan Raksha Padak Award hi mi dang chhan nana mahni nunna thapa chhan chhuah hna thawkte hnenah hlan ṭhin a ni a. He Award hi chi 3 - Sarvottam Jeevan Raksha Padak, Uttam Jeevan Raksha Padak leh Jeevan Raksha Padak-ah te ṭhen niin, kum 2022 atan India ram pumah mi 43 hnenah he chawimawina hi hlan a ni a. Mizoram aṭangin mi 6-in he chawimawina hi dawngin, Sarvottam Jeevan Raksha Padak dawng 1, Uttam Jeevan Raksha Padak dawng 2 leh Jeevan Raksha Padak dawng 3 an awm a. Kolasib District aṭanga dawng mi pahnih hian Uttam Jeevan Raksha Padak ve ve an dawng a ni.

Heti ang hi he chawimawinain lawmman a ken dan a ni:

(1) Sarvottam Jeevan Raksha Padak (Medal + Certificate + ₹ 2 lakh)

(2) Uttam Jeevan Raksha Padak (Medal + Certificate + ₹ 1.5 lakh)

(3) Jeevan Raksha Padak (Medal + Certificate + ₹ 1 lakh)