1878/2023-2024

Vawiin chawhma khan Serchhip DC Pu David Lalthantluanga chuan Serchhip District a Scouts and Guides President atan lak luh a ni a. Hemi puala function tawi leh urhsun tak, Serchhip DC Conference Hall a buatsaihah hian Serchhip DIPRO Pi Lalnunmawii pawh Assistant District Commissioner (G) atan lakluh a ni.

Pu David Lalthantluanga chuan Serchhip District Scouts and Guides President atana lakluh a ni chu lawmawm tiin a tan malsawmna ropui tak a nih thu a sawi. Bharat Scouts & Guides te chanchin a bihchian thu sawiin DC chuan British hunlai daih tawh a din, kum 1950 atanga mumal taka India rama kal chho a nih dan te, sulhnu chhinchhiahtlak tam tak an hnutchhiah tawh nia a hriat thu a sawi a. Thil tha ti tura din an nih avangin Mizo hnam nun leh society nen pawh a in mil a, a YMA hle niin ka hria, DC chuan a ti. Serchhip District ah hmachhawp hrang hrang an nei a, school naupangte pawh an phur hle a, heng hmachhawp te hi tluang taka an tih puitlin theih zel a beisei thu a sawi bawk.

Bharat Scouts and Guides, Mizoram State Secretary Pu Lalngilneia Colney pawhin Mizorama he movement an kalpui dan leh hruaitute inkhaidiat dan te a sawi a. Bharat Scouts and Guides chu tlawmngai pawl, zirlaite khua leh tui thaa siam tura buatsaih tu an ni a; scouts and guides zawng zawng te chu nute tana thil tha ti tura zirtirin, nitin vawi khat tal thil tha ti tura beisei an nih thu a sawi a ni.

Serchhip District Secretary Pu CVL Hruaia pawhin Serchhip District chhunga hma an lo lak tawh dan leh an hmachhawp hrang hran a sawi a. Tritiya Sopan camp leh campfire te pawh neihpui an tum thu a sawi.

Serchhip District huamchhunga khaw hrang hrangah tun dinhmunah Bharat Scouts and Guides unit pasarih (7) a awm mek a ni.