Vawiin khan Parish Hall, Venglai Kolasib ah Mizoram Sawrkar Flagship Programme, New Economic Development Policy (NEDP) hnuaia hmalakna pakhat, Mizoram Kailawn 2018 chungchang in hrilhhriatna hun hman a ni.

He hunah hian Kolasib Bawrhsap Dr.Arun T, IAS chuan thu sawiin Skill Developmenta kan la hniam avangin tan lak a ngai nasa ani tiin Skill Development na a tana Sawrkar in Scheme leh ruahmanna hrang hrang a siam chu zirchianga hman tangkai ngei tum turin kalkhawmte a chah a. Mahni inhai kuakna kawng ti awlsawm turin Kolasib District Mipuite chu an vanneih bik thu sawiin chu chu Kolasib District leilung bakah a awmna hmun (Location) in theihna sangtak (High Potential District) a nei ani a ti. Heng malsawmna a thlawna awmsa te hman tangkai chu mipuite mawhphurna  ani tiin theihtawp chhuah turin kalkhawm te a fuih a ni.

Dr. Jayan Chandran IFS, Dy.Secy. Law & Justice Ministry, Govt. of India pawhin thu sawiin Mizoram Sawrkarin hetiang ruahmanna a siam chu lawmawm a ti a, Sumdawnna emaw hmalakna kawng dangah pawh scheme hrang hrang awm te chu zirchian peih a pawimawh a ni tiin eng hna pawh thawk dawn ila Bank Account leh Life Insurance te chu ngaih pawimawh nachang hre turin kalkhawmte a chah a hemi bakah hian ruahmanna fel tak nen hmalakna kalpui a pawimawh thu a sawi bawk a ni.

Entrepreneurship Development Scheme (EDS) Master Trainer, Dr. Vanlalthlana (Astt Proff, PUC) chuan NEDP chungchang leh Mizoram ina Enterpreuner tha a mamawh dan te, Enterpreuner tha  nih theih dan te leh mi hlawhtling ni thei tura kalphung hrang hrang te a sawi a, Pi Lalrinngheti Sangsiama, Managing Partner, Mizoram Consultancy Group chuan mi hlawhtling ni tur chuan ngaituahna fim leh  ruahmanna fel neih a tul thu sawiin Entrepreneurship Development Scheme hmalakna kal zel ah Mizoram Kailawn (Business Plan Contest) 2018 chungchang a sawi a, tel duh te tana hmalak dan tur tlangpui leh hming pekluh dan sawifiahna hun hmang bawkin, Kolasib atanga kum 2017 Business Plan Contest a Finalist, Zodinthara'n EDS hnuai a Training hrang hrang an neih dan leh a hlawkpui dan te a sawi bawk a ni.

Mizoram mi tupawh kum 18 chunglam sumdawnna emaw thil siamchhuahna thar remchang hria eizawnna leh sumdawnna suangtuah chhuak thiam te tan kumin ah hian intihsiakna  (Business Plan Contest) Mizoram Kailawn buatsaih leh mek a ni a, he intihsiakna hi 10th May 2018 thleng in dilna thehluh theih a ni a, www.mizoramkailawn.org kaltlang a thehluh tur a ni. A tling te chu uluk taka training pek an ni anga, an ruahman na te a tak a chan theih dan tur mithiam ten an  zirtir ang. Chumi hnu ah an tih that dan a zir in EDS 2018 ah lawmman pek an ni dawn a ni. Tun kum 2018 – 2019 a Mizoram Kailawn atan lawmman cheng nuai 10 dah a ani.

Vawiin Programme ah hian Kolasib khaw chhung a St. John's HSS zirlai naupang, Self Help Group hrang hrang bakah mimal sumdawnna lama tui mi te an kalkhawm a ni.