Mizoram Sawrkara Planning & Programme Implementation Department leh IIM Calcutta Innovation Park te tangduna Entrepreneurship Development Scheme hnuaia, mahni kutkawiha eizawnna kawnga inzirtirna leh intihsiakna ‘Mizoram kailawn’-Business Plan Contest-2019 chungchanga inhrilhhriatna hun chu vawiin khan Kolasib St.Joseph’s Parish hall ah hman a ni.

He hun kaihruaitu Bawrhsap Pu Zoengsanga chuan Hnam rethei leh riltam nih chuan a huaisen theiloh a, Ram leh Hnam intodelh ni tura ngaituahna sen chu Mizo zawng zawng mawhphurna ani a ti. Silchar kawng ping hlek se kan che buai a kan bungraw neih sa (a toa lak nilo) chu to uchuak taka zuar/hralh duh Kristian kan ni a kan in enfiah a hun ani tiin he Ram chhunga cheng zofate hian kan Ram hi kan siamthat a hun a, ei leh bar bakah kawng hrang hrangah kan intodelh a hun a, kan Ram hi eng dinhmunah nge a din, kan Ram tan hian enge ka tih theih tih hi mahni inzawh fo a tul a ni a ti. Bawrhsap chuan eizawnna kawnga ngaituahna seng te tana kawng zau zawka inzirtirna leh tanpuina chungchang ‘Mizoram kailawn’ outreach Programme buatsaih ani chu lawmawm a tih thu sawiin kalkhawm te chu ngaithla liam lova a taka hlawkpui tum theuh turin a chah bawk a ni.

Pi Zorammawii Ralte, Mizoram Consultancy Group chuan Mizoram kailawn chungchang sawi zauna hun a hmang a, Mizoram kailawn-2019 chu a vawi thumna (kum 2017 leh 2018 ah buatsaih tawh) ani tiin he thila ina a tum ber chu Mizo te zingah entrepreneurship tuh a, Mizorama entrepreneur ni mek leh nih tum te zawn chhuah a, hlawhtlinna nei thei tura tanpui leh buatsaih ani a ti. Hemi bakah hian Mahni kutkawiha eizawnna kawngah mahni tan chauha hlawkna ni lovin inelna a tel te leh mithiam rualte ina suangtuahna leh ruamhmanna tha an neih te chu midang leh khawtlang tana zau zawka tangkaina neih te a ni a ti bawk.
Mizoram kailawn hi business plan intihsiakna leh entrepreneurship summit ani a Mizoram hmun hrang hranga Sumdawnna bul tan tir te leh bul tan nan bakah Mizoram than zel nana suangtuahna leh ruahmanna (idea) nei te chuan online in website www.mizoramkailawn.org ah saptawngin ruahmanna (business plan) chu thehluh tur ani a sector/domain a hranpa a then a awmloa heng dilna (business plan) thehluh atang hian IIM mithiam ten top-40 thlangchhuakin September chawhnu lamah Boot Camp buatsaih sak anni dawn a, Boot Camp ah hian IIM Calcutta a mithiam ten inelna a tel te chu an theihna tipung zawng leh awmze nei zawka ruahmanna kalpui thei turin an hrual dawn a, a titha zual te hnenah bul tanna tur sumfai tanpuina pek an ni ang.

Mizoram kailawn intihsiakna a tel duh tan dilna form/Application hi July Ni 17, 2019 atangin thehluh theih ani anga, August ni 9 chu dilna thehluh hun ni hnuhnung ber a tan ruat a ni. He hunah hian Kolasib a Head of Office thenkhat bakah District chhunga Self help group, Govt.Kolasib College, St.John’s HSS leh CZ HSS zirlaite an kalkhawm a ni.