Mizoram DIET Faculty Council (MDFC) chuan vawiin khan an Conference vawi khatna chu Hotel Regency Conference Hall-ah an hmang. He inkhawmah hian Chief Minister Pu Zoramthanga chu khuallian niin, School Education Minister Pu Lalchhandama Ralte chu khualzahawm a ni.

Khuallian Chief Minister Pu Zoramthanga chuan DIET Lecturer kalkhawmte chu ramin zirna lama hma a sawn nan theihtawp chhuah tlang a thawhpuiah a sawm a. An service chungchanga harsatna an neihte pawh uluk taka sawrkara mithiamte nen inrawn chunga ngaihtuahsak an nih tur thu a sawi. Chief Minister chuan DIET lecturer te chu mithiam kalkhawm an nih angin leh zirlai zirtirtu turte hnena thiamna hlanchhawngtu an nih avangin mi ngaihtuahna leh rilru sutthlek kaihhruai kawngah mawhphurhna an nei thui hle a ni, a ti a. Hmasawn tura Mizoramin asset, ro a neih chu ram zau tha tak te, ruahtui tha, sik leh sa nuam tak, leihnuaiah gas, a chhunga cheng tam zawk lehkhathiam, tawng khat hmang a nihna te hi a ni a, hmasawn tur chuan heng aia beisei tur dang kan mamawh lo a ni tiin Chief Minister chuan a pawimawh ber zawk chu heng kan asset neihte hi ram intodelh leh hausa kan nih theih nan a hmang tangkai tura thiamna leh rilru thlak danglam hi a ni, a ti.

School Education Minister Pu Lalchhandama Ralte chuan zirna leh hriselna tihhmasawn chu sawrkar in a ngaihpawimawh ber te zing a mi a ni a ti a. Hmasawnna ruangam tha tak taka dinchhoh ni mahse a hmang tangkaitu tur mihring ber tihhmasawn an nih lohva human resource tha kan neih loh chuan hmasawnna a rualkhai lovin awmzia a nei thui dawnlo a ni, a ti. Khualzahawm chuan DIET lecturer zingah M.Ed nei duhthusama an tam tawk loh thu leh doctorate nei an tlem thu sawiin, hun lo kal zel turah zirna sang zawk duh belh zel a nih dawn avangin tuna thawk mekte chu zir zawm tumna rilru pai tura chah in, study leave an neiloh avanaga harsatna awm thei chu a hriatpui thu sawiin Education Minister chuan an hnathawh tibuai tlem thei ang bera zirna chhunzawm dan kawng chu inrawn chung zela ngaihtuah tha a tih thu a sawi. Transfer and posting chungchang sawiin Pu Lalchhandama Ralte chuan transfer chu an hna in a ken tel a ni tih hre reng turin leh mahni duhna hmunah chauh awm tum lo turin lecturer te chu a chah a. Aizawl a in hnawhtawt vak a thing tlang lam a thawrawng chu sawrkar duhdan a nihloh thu a sawi. School Education Minister chuan Mizoram DIET hrang hrang ten work plan an siam pawh sawrkar laipui in a lo dawnsawn danah a beiseiawm hle tih a puang.

Mizoram DIET Faculty Council hian CM Relief Fund a chhunluh turin Chief Minister hnenah hian pawisa an hlan nghal a ni. Vawiin MDFC Conference hi an president Pu Lalchhuanawma chuan kaihruaiin, Pi Louise VL Rinsangi, DIET Kolasib lecturer chuan kalkhawmte lawmna thu sawiin vice president Pu Zothankima hnen atangin DIET dinchhoh a nih dan leh hmalakna hrang hrang te ngaihthlak a ni a. Inkhawm hi Aizawl DIET lecturer Pu TBC Lalniliana chuan lawmthu sawiin a khar a, chawhnu lamah MDFC hruaitu thlanna neih a ni.