2753/2023-2024

2023 Sahmulphah thla ni 8: Vawiin khan November ni 7, 2023-a MLA Inthlanpui neih zawh taka Kolasib District-a assembly constituency pathum - 4-Tuirial (ST), 5-Kolasib (ST) leh 6-Serlui (ST) biala inthlan kalpui dan leh vote tlak dan thlir hona (post-poll scrutiny) chu he'ng bial pathuma General Observer Pu Anant Lal Gyani hovin Government Kolasib College-ah buatsaih a ni.

He hunah hian Kolasib District Election Officer & 5-Kolasib Assembly Constituency Returning Officer Pu John LT Sanga, 4-Tuirial AC Returning Officer Pi Melody Ngurthantluangi, 6-Serlui AC Returning Officer Pu Lalmuan Puia leh Assistant Returning Officer-te leh political party hrang hrang ai awhte an tel a. Police Observer Pu S. Chaitanya leh Kolasib District chhunga critical polling station 7-a micro observer-te an tel bawk.

Polling station-a inthlan buatsaihnaa thil fel lo complaint awmna emaw; EVM kaihhnawiha harsatna thlenna emaw; polling station-a vote thlak zinga an nihna finfiah nana EPIC aia ID Card dang hmang 25% aia tam an awmna emaw; assembly constituency khata vote tlak dan chawhrual aia za zela 15-a tam emaw, za zela 15-a tlem emaw vote tlakna polling station emaw; Election Commission of India-in enfiah ngai criteria a siam anga enfiah ngai polling station-te chu post-poll scrutiny hmang hian zir bing tur a ni a. He hunah pawh hian Kolasib District chhunga assembly constituency pathuma zir bing ngai polling station-te chu thlir ho niin, thil fel hlel leh rinhlelhawm a awm lo tih pawm tlan a ni.

November ni 7, 2023-a Kolasib District chhunga inthlan buatsaihah EVM/VVPAT khawl chiang lo thlak ngai pali a awm a. Polling station pahnihah inthlan vote thlak ṭan hmaa enchhinna (mock poll) kalpui laiin VVPAT khawl chiang lo thlak a ni a; polling station pakhatah mock poll kalpui laiin EVM Ballot Unit thlak a ni bawk a; vote 17 a tlak tawh hnua VVPAT thlakna polling station pakhat a awm bawk. He'ng polling station-ahte hian harsatna dang thleng lovin tluang takin vote thlak zawh theih a ni.

Vawiina post-poll scrutiny neih zawh hian General Observer leh official-te chuan constituency tin strong room kalh leh seal hmanga char fel tawh chu an enfiah leh a. Political party ai awhte awm laiin inthlanna lehkha pawimawh (election paper) dahna strong room pawh kalh a, seal hmanga char fel nghal a ni bawk.