Vawiin khan Kolasib DC Office complex ah mipui ten zau zawk leh chiang zawka vote thlak dan leh vote thlak na khawl bakah vote thlak dan kalphung an hriat theihnan Model Polling Station chu Rualbanlo pahnih K.Zonunsanga leh Lalhmingmawii ten an hawng.

District election Officer Dr.Arun T, IAS chuan model polling station chu inthlanpui awm hma chhung zawng mipuite tan tlawh theiha hawn anih tur thu sawiin, kumin inthlanpuia thupui ‘vote nei zawng zawng ten vote an thlak ngei’ (no voter to be left behind) theih nana hmalak na kal zel ah he model polling station ah hian inthlan huna polling station chhunga bungrua(EVM, VVPAT etc) bakah inthlan buaipui tute (polling Officer, polling agent) hnathawh leh kalphung te chu ziaka tar an ni dawn a, rualbanlo te tan pawh awlsam zawka vote an thlak theih nan polling station zawng zawnga kawng zawh tur (ramp) te ruahman a ni tur thu a tarlang bawk. 

Hawnna inkhawmah hian Kolasib khawpui chhunga Sawrkar hnathawk hrang hrang, rualbanlote, khawtlang hruaitute, political party aiawh te, MPF member te bakah Media mite an kalkhawm a, model polling station chhunga dah EVM leh VVPAT te chu a taka enchhin na an nei bawk a ni.