Vawiin khan Kolasib DC Conference Hall-ah Kolasib-a MPSC Exam Centre dah tur chungchangah meeting neih a ni a. DC Pu Jitender Yadav, IAS chuan he hun hi kaihruaiin Er. Lalbiakthanga Sellai, Member, MPSC leh Pu Vanrambuatsaiha, Joint Secretary, MPSC te he hunah hian an tel a ni.

Tun hnai maia Kolasib-a MPSC Centre hawn tur chungchang hi sawiin DC Pu Jitender Yadav chuan Kolasib District tan malsawmna a ni, a ti a. Thalai tamtak lehkhathiam ten pawisa senga Aizawl pan buai leh thlen In harsatna te pumpelh a nih theih tawh dawn thu a sawi a. Mahni kawtkai/inlum ngei atanga Exam pawimawh tak an hmachhawn thei tur hi a lawmawm hle a ni, a ti a. Hemi atana sawrkar leh MPSC te hmalakna chu a fak thu pawh a sawi a ni.

Pu Lalbiakthanga Sellai chuan MPSC hian theih tawp chhuahin Mizote zingah inelna thianghlim awmtir turin hma a la thin a, vawiin ni thleng hian kan kal dan pawh dik leh felfai thei ang berin tuemaw duhsak bikna lantir awm lovin kan la kal a ni, a ti a. Kum nga dawn MPSC member a nih chhungin sawrkarna chelhtu CM leh Minister te atanga lehkhathem leh phone, tuemaw duhsak dilna ang an dawng lo chu ropui a ti hle tih a sawi a ni. Kolasib chu Centre tha neih tum tur leh thalai Competition hmachhawn tura mi tam zawk ke pen chhuak tura fuih turin Meeting-a tel, Deptt. hotu thenkhat leh NGO te chu a ngen bawk a ni.

MPSC Exam Centre atan hian Govt. Kolasib College chu thlan a ni a, hei hi hun hmalam engemawchen lo survey tawh hnua tihfel a ni. Beisei ang chuan Centre hi kumin 2014 chhung ngeia hman hman tum a ni.