1528/2026-2027

Kolasib, 27th July, 2026: Vawiin khan DC Conference Hall, Kolasib-ah Kolasib Bawrhsap Pu H. Dolianbuaia kaihhruaiin Kolasib District atana My Bharat District Advisory Committee (MYB-DAC) thutkhawm hmasa ber neih a ni.

Thutkhawm kaihruaitu Bawrhsap Pu H. Dolianbuaia chuan thu sawiin, 'My Bharat' kaltlangin central sawrkarin thalaite hmasawnna tur hmalakna a neih nual thu a sawi a. "Viksit Bharat 2047 tihlawhtling turin sawrkar chuan thalaiten an thiamna leh theihnate an tihhmasawn theihna turin intihsiakna hrang hrang leh platform tha tak a siamsak a. He platform hi lianin tangkai hle mah se, district level-ah erawh duh angin kan la hmelhriat tawk lo hle a ni," a ti. My Bharat chu central sawrkarin a ngaih pawimawh em em a nih thu sawiin, thalaite  anmahni theihna haichhuak tur leh ram hmasawnna tura ke an pen theih nan a pui tu pawimawh tak a ni, a ti.

He hunah hian Pu Sandeep, District Youth Officer, Nehru Yuva Kendra, Kolasib leh he committee-a Member Secretary ni bawk hnen atangin 'My Bharat' chungchang sawifiahna leh report ngaihthlak a ni a. Kolasib District chhungah My Bharat portal-a inziak lut (register) tur hian mi 4,000 target a nih thu a sawi. He portal-a inziak lut tur hi kum 15 atanga 29 inkar thalaite tan bika ruahman a nih thu a sawi a. Target tihlawhtling tur leh thalaiten hamthatna an dawn theih nan district chhunga sawrkar office hrang hrangte, tlawmngai pawl (NGO), school leh college te chu  thawhpuiah a sawm nghal a ni.

'Mera Yuva Bharat' (My Bharat) hi central sawrkarin India rama thalaite (kum 15-29 inkar) tana a buatsaih platform lian tak, thalaite thiamna (skill) tihhmasawnna tur leh hmalam huna ram hruaitu tha an lo nih theih nana ruahmanna a ni a. He platform kaltlang hian thalaiten an theihna te phochhuakin, thiamthil thar an zir theih bakah, sawrkar hmalakna hrang hrangah a taka tel ve theihna  an neih theihna tur atana duan a ni.