1529/2026-2027

Lawngtlai, 27th July 2026 : Vawiin khan 'MY Bharat District Advisory Committee, Lawngtlai District' chuan an Chairman leh bawrhsap nibawk Pu Donny Lalruatsanga kaihhruaiin a Office Chamber-ah thutkhawm thawhkhatna an nei.

Pu Donny Lalruatsanga chuan Member kalkhawmte chibai bukin, Ministry of Youth Affairs & Sports, Government of India thuchhuak anga 'MY Bharat District Advisory Committee' din a nih thu a sawi a. A tum ber chu thalaite hmasawnna tura NSS, NYKS, School, College, Youth Club leh NGO- te nen thawhhona tha siam a ni, a ti. Lawngtlai District-a MY Bharat programme- hlawhtling taka kalpui tur te; thalaite MY Bharat Portal-a in register tura fuih te, Volunteer Service, Skill Development, Leadership leh Community Service Programme- ah te hmasawnna awm tura theihtawp chhuah turin bawhrsap chuan District Advisory Committee Member - te a sawm nghal bawk.

Pu Aman Trivedi, District Youth Officer leh Member Secretary nibawk chuan 'Mera Yuva Bharat (My Bharat)' awmzia, a kalphung leh hmalakna bakah a bik taka District - a kalpui dan tur tlangpui sawizauna a nei a. Lawngtlai District Advisory Committee - chuan 'Mera Yuva Bharat (My Bharat)' chu tha taka kalpui ni se, MY Bharat Portal-a in register tura hmalak hmasak tul tiin, hemi atan hian School leh College- ah 'Awareness Campaign' kalpui ni se an ti a. Lawngtlai District- a nula leh tlangval ( kum 15- 29 inakar) te chu India ram hmasawnnaa tha thawhtu tangkai tak an nih ve theih nan ruahmanna felfai tak siam ni se an ti bawk a ni.

Vawiin thutkhawmah hian 'MY Bharat District Advisory Committee, Lawngtlai District' Member- te an tel kim tha hle a, Pu Donny Lalruatsanga chuan lawmthu sawiin hun a khar.