1530/2026-2027

Dated Aizawl, the 24 July 2026: Kar hmasa Zirtawpni khan Rural Development & Administration (RD&A) Department changtu Minister Prof. Lalnilawma chuan Vanapa Hall-ah, Govt. J. Thankima College Students’ Union buatsaih Zirlai lut tharte lawmna (Freshers’ Social) leh tun hnaia MZU-in result a tihchhuah taka Zirlai tithate chawimawina bakah Annual Magazine tlangzarhna hun chu khuallian niin a hmanpui a, Zirlai tithate hnenah hian lawmman a hlan nghal bawk. 

He hunah hian Khuallian Prof. Lalnilawma chuan lawmpuina leh fuihna thute sawiin, Govt. J. Thankima College-in University Examination-a zirlai tithate chawimawina hrang hrang a sem thin chu lawmawm a tih thu a sawi a. Chung lawmmante chuan zirlaite mizia leh nunphung a ken tel  avangin ngaihhlut awm hlea a hriat thu tarlangin, Zirlaite chu mahni inchher hriam zel tur leh hruaitute thlawp thiam tur tein a fuih a. Prof. Lalnilawma chuan Govt. J. Thankima College chu a tha zual lawr nghal ngawt lo va mi tin ban phak a ni chu ropui a tih thu sawiin, chu mai bakah  NAAC A+ grade an hmu thei leh zelte chu hlu leh ropui a tih thu a sawi a. Minister chuan, 'College zir hun lai chu tu tan pawha pawimawh leh hriatreng thin a nih avangin Zirlaite chu hun hmang thiam tur leh Social Media hmang fimkhur turte a chahin, NEP-in zirlaite thanlenpui tura a ruahman - hruaitu nih dan thiamna (Leadership), harsatna hmachhawn dan (Problem solving skills) te, environment awareness leh faina (cleanliness) te chu zir chhuah ngei tuma theihtawp chhuah turin zirlaite chu a fuih nghal bawk a ni. 

Freshers’ Social pual hian Prof. Lalnilawma chuan College chhunga University Examination-a subject hrang hranga College topper mi 8-te hnenah Principal’s Award semin, College Principal Prof. JV Nunchunga’n Annual College Magazine a tlangzarh nghal bawk a. Tun hnaia Mizoram University Examination result chhuakah khan JTC atang hian 2nd Semester-ah 80.59%, 4th Semester-ah 84.10% leh 6th Semester-ah 96.77%-te an pass a ni.

Tun dinhmunah Govt. J. Thankima College-ah hian zirtirtu 39 leh office lama thawk mi 12 an awm mek a. BA zirna subject pariat (8) - English, Mizo, History, Economics, Education, Political Science, Geography leh Bachelor of Business Administration te kalpui mek niin, Zirlai  773 lai an awm bawk a ni.

He hun hi Vice Principal Lalhmunsiami Khiangte chuan kaihruaiin, kalkhawmte lawmna thu a sawi a. Students’ Union Assistant General Secretary Lalrinnunga hnen atangin SU hmalakna hrang hrang report ngaihthlak a nih bakah, SU Vice President Laltlanhlua’n thu a sawi a. College lut thar te hnen atangin class aiawha thusawi ngaihthlak a ni bawk.