1531/2026-2027 

Dated Aizawl, the 28 July 2026: Nimin khan Disaster Management & Rehabilitation Minister Prof. Lalnilawma chuan United Nations Secretary-General (SRSG) for Disaster Risk Reduction (UNDRR) Special Representative Pu Kamal Kishore chu New Delhi Mizoram House-ah a kawm a. Technical thila thawhhona ṭha zawk an neih theih dan tur an sawi dun a ni.

Minister chuan khuarel chhiatna hrang hrang - lirnghing, leimin, lung tla, sik leh sa inthlak danglamin a nghawng chhiatna dang te laka Mizoramin harsatna a tawh theih dan a sawipui a. Heng chhiatna lo thleng thut thei laka Mizoram mipuite an inven theih nan khawpui ruahmanna ṭha zawk siam leh insak dan chungchangah pawh tunlai thiamna hmanga building sak dan tur kaihhruaina ṭha zawk siam chungchanga Mizoram hmalakna te; Aizawl khawpui tawt lutuk chungchang leh Thenzawl Peace City atana ruahmanna an siam dan te a sawi a ni.

National Disaster Management Authority (NDMA) te nen thawkhoa leimin nasa laka himna tur Mizoram Sawrkarin project a siam te, chhiatna a thlen hmaa rang zawka ral khel dar (warning system) tih rik dan tur te, in sak dan him leh ṭha zawk te leh mipui inralrin dan tur zirtirna te pawh sawilan a ni a. Heng chhiatna laka Mizoram mipuite himna tura tunlai thiamnaa ṭanpui an ngaihzia te Prof. Lalnilawma chuan a sawi a ni. 

Special Representative Pu Kamal Kishore chuan Mizoram hmalakna ṭha a tih thute leh UNDRR chuan thiamna kawnga ṭanpui tur leh, ramdang mi thiam bikte nena Mizoram State thlunzawm dan tur chungchangah an inhawn thu a sawi a. North-East Regional Disaster Management Conclave Mizoramin a thlen tur chungchang pawh he meeting-ah hian an sawi dun a ni.

Khawvel sik leh sa danglam zelah khuarel chhiatna nasa zawk thleng thei do let dan tur leh inbuatsaih lawk dan tur te, chhiatna nasa zawk a thlen lohna tura Sendai Framework for Disaster Risk Reduction inkaihhruaina zawm leh thlawp chungchang te sawiin meeting hi tihtawp a ni. 

DM&R Minister hi Renu Sharma, Adviser to Govt of Mizoram; Shweta Chauhan, IPS, Resident Commissioner, Mizoram House New Delhi; Sushil Singh IAS , Secretary DM&R leh Alexander V. Chongthu, Additional Resident Commissioner, Mizoram House, New Delhi ten an ṭawiawm a ni.