2093/2026-2027

Kolasib, 7th September, 2026: Vawiin chawhma dar 10:00 khan DC Conference Hall, Kolasib-ah District Research Officer (DRO), Kolasib huaihawtin, Mizoram District Transformation Programme (MDTP) 2025–26 hnuaia "My District My Vision for 2047" (Kolasib District) essay intihsiaknaa titha zualte hnenah lawmman semna hun hman a ni.

He hunah hian lawmman semtu Pi B. Malsawmtluangi, Addl. DC, Kolasib chuan thu sawiin, mihringte hian theihna (talent) hrang hrang kan nei theuh a, ngaihtuahna leh thlir lawkna tha tak nei pawhin thiam takin lehkhaah an ziak chhuak thiam kher lo thei a ni, a ti. Ziakmi te chu lehkha chhiar peih an nih tlangpui thu sawiin, kalkhawmte chu lehkha chhiar uar zel turin a chah a ni. India ramin hma a sawn theih nana hmachhawp, Viksit Bharat 2047 chungchang a sawi bawk a. Tunlai thiamna sang Artificial Intelligence (AI) a rawn hluar chhoh zel takah hian, a thatna lai awm bawk mah se mahni ngaihtuahna pawh hmang lek lo a  'fake intelligence' awm thei lakah fimkhur a tul hle a ni, a ti.

He intihsiaknaah hian "My District, My Vision for 2047" Kolasib District tih chu thupui atan hman a ni a. Intihsiaknaah hian mi 32 an tel a, essay ziakte hi uluk taka endik a nih hnuah a titha mi 8 thlanchhuah an ni. Heng a titha zual mi pariatte hnenah hian lawmman (Cash Award leh Citation) hlan an ni.

Vawiin lawmman semna hunah hian Pu Zoremmuana Ralte, DRO; Pi B. Malsawmtluangi, Addl. DC; Pu H. Lalramliana, SDO (Sadar); Pu David A. Lalhmingchhuana, DIPRO te bakah MJA member-te, chanchinbu mite leh tawiawmtute an tel a ni.

Lawmman dawngtute chu hetiang hi a ni:

First Prize: R. Laltlanmawii, Tumpui, Kolasib

Second Prize: Lalzikpuii, Tumpui, Kolasib leh Lalnuntluangi, Govt CZ HSS

Third Prize: Gracy Lalhruaitluangi, Convent Road, Venglai leh Lalthafala Rokhum, New Diakkawn, Kolasib

Consolation Prize: John Lalthlamuana, Tumpui, Kolasib; Lallawmawmi Khawlhring, Project Veng, Kolasib leh Lalhmahruaia, Jubilee Road, Diakkawn te an ni.