1872/2023-2024

2023 Mimkut thla ni 13: Vawiin khan Kolasib District Education Committee buatsaihin Kolasib-a Govt Diakkawn High School Hall-ah National Award to Teachers 2023 dawngtu, Govt Diakkawn High School, Kolasib-a Teacher Pu Lalthianghlima chawimawina leh lawmpuina hun hman a ni.

He hunah hian Kolasib Bawrhsap, District Education Committee Chairman Pu John LT Sanga chu Khuallian a ni a. Bawrhsap Pu John LT Sanga chuan National Award to Teachers 2023 dawngtu Pu Lalthianghlima chu District Education Committee hmingin lawmpuina memento a hlan bakah, ama pualin lawmpuina puanbah a hlan a. Pu Lalthianghlima chu Mizoram leh Kolasib District tihmingṭhatu a nih thu sawiin, India rama zirtirtu tam tak zinga zirtirtu ṭha 50 thlan chhuah zinga a tel chu a chhuanawmin a ropui tak zet a ni, a ti.

Bawrhsap Pu John LT Sanga chuan zirtirtute pawimawhzia sawiin, ram siamnaah zirtirtute'n an thawh hlawkin, an mawhphurhna a lian ber a, ram hma hun innghahna zirlaite zirtirtu an nih angin, an kaihhruai zirlaite nun thlak danglam turin ṭhahnem ngai taka an thawh a ṭul, a ti a. An ṭawngkam khat lekin zirlaite fuih phurin, chakna a pe thei a, an ṭawngkam ho tea ngaih pawhin a tihnual thei bawk tih sawiin, zirlaite hmaah ṭawng fimkhur tur leh zirlaite dawm kang thei tur zawnga zirtir ṭhin turin zirtirtute chu a chah a. Hun tam zawka nu leh pa tam takte rochan fanau enkawltu an nih angin zirtirtute mawhphurhna chu a sang hle tih sawiin, hmangaihna, ṭhahnem ngaihna leh khawngaihna nena naupang enkawl tur te, lehkhabu pawn lama an tana ṭangkai tur zirtir kawngah leh hlim taka lehkha an zir theihna tur boruak siam kawngah te ṭan la thar turin a chah a. Kum tharah Kolasib District aṭanga National Award to Teachers dawng an awm leh ngei a beisei thu sawiin, zirtirtute chu duhsakna a hlan a ni.

Kolasib District Samagra Shiksha-a Deputy District Project Coordinator Pu R. Lalramhluna kaihhruai he hunah hian National Teacher Awardee 2023 Pu Lalthianghlima pawhin thu sawiin, Award a dawn theih chhan chu Pathian khawngaihna vang a ni, a ti a. Award a dawn theih nana buaipuitu leh hma lakpuitu zawng zawng chungah lawm thu sawiin, Award dawng turin thil ropui tak tih tum kher a ngai lo va, ni tin theih tawp chhuaha ṭhahnem ngai taka zirlaite zirtir chu Award lak nan a tawk em em a ni, a ti a. Zirtirtute tan zirlaite bula hlim hmel put leh zirlaite chawh hlim thiam ṭul a tih thu sawiin, zirtirtute tan kawng hrang hranga hlawhtlinna nei turin hotute thu awih pawimawh a tih thu a sawi bawk.

He hunah hian Circle Education Officer Pu John Lalbiakliana Pachuau chuan powerpoint presentation hmangin National Award to Teachers dawn theih dan leh dawng tura pal tlang ngaite tar langin, a sawi fiah a. Kolasib District Education Officer Pi K. Lalsiamliani'n Pu Lalthianghlima chu National Award to Teachers 2023 a dawn chungchangah mipui hriat atana pawimawh tur zawhna a zawt a. National Teacher Awardee lawmpuina thilpek hlanna hun leh a duh apiang tana thu sawina hun hawn niin, zaithiam zai te ngaihthlak a ni a. Hindi Education Officer Pi Annie Lalbiakengi'n lawm thu sawiin hun a khar a ni.

He hunah hian sawm bik sawrkar official-te, National leh State Teacher Award lo dawng tawhte, zirtirtute, zirtirtu inzawm khawm pawl hrang hrang ai awhte, District MJA te, Pu Lalthianghlima chhungte leh Govt Diakkawn H/S zirtirtu leh zirlaite an kal khawm a ni.

National Award to Teachers dawng tur hian online-a dilna theh luh a, District Selection Committee, State Selection Committee, Regional Selection Committee leh Independent Jury at National Level te pal tlang hnuah Ministry of Education-in a pawm a ngai a. National Award to Teachers 2023 dawng tur hian mi 50 thlan niin, Award hian chawimawina thuziak bakah pawisa fai ₹ 50,000/- leh silver medal a keng a. Pu Lalthianghlima hian September ni 5, 2023 khan Vigyan Bhawan New Delhi-ah India President Pi Droupadi Murmu hnen aṭangin National Award to Teachers hi a dawng a ni.