1871/2023-2024

2023 Mimkut thla ni 13: Vawiin khan Kolasib Diakkawn YMA Hall-ah Kolasib Assembly Constituency huam chhunga Family Oriented Socio-Economic Development Programme (SEDP) Phase 2 hnuaia ṭanpuina dawng turte tana thil pawimawh inhrilhfiah tharna, "Beneficiary Assembly & Re-orientation" buatsaih a ni a. Kolasib Bialtu MLA, Food Civil Supplies & Consumer Affairs Minister Pu K. Lalrinliana chu Khuallian a ni.

Khuallian Pu K. Lalrinliana chuan ram leh hnam zahawm ni turin intodelh a pawimawh a, Mizoram tan ei leh bara intodelh turin ṭan lak a ṭul hle tih a sawi a. Kan ram intodelhna tura thar chhuah theih leh hlen chhuah theih hlen chhuah a nih theih nan SEDP chu ruahman a nih thu sawiin, Family Oriented SEDP Phase 2 dawng tura thlan zawng zawngte chu SEDP thil tum tipuitling tura tihtak zetna nena an trade thlanah hma la turin a chah a ni.

SEDP chu sawrkar flagship programme a nih angin sawrkarin a ngai pawimawh hle tih sawiin, Minister Pu K. Lalrinliana chuan SEDP hma lakna kalpui tura ruahmanna eng emaw chen siam a nih hnua hma lak ṭan a nih dawn lai takin COVID-19 hri lengin ruahmanna tikhaihlakin, SEDP pawh a nih dan tur takin duh anga bul ṭan hma theih a ni ta lo tih a sawi a. Hripui leng avang hian State sawrkarin Sawrkar laipui aṭanga sum a hmuh tur ₹ vaibelchhe 3,600 chuang a hmuh loh phah thu leh, hripui hnuah lirnghing, ramri buai leh raltlan boruak avang te'n ruahman lawk loh leh rin lawk lohva sum hmanna a tam thu sawiin, heti ang hun khirh kara vawiin kan thleng thei hi Pathian hruaina avang liau liau a ni, a ti a. SEDP chu duh anga hmaah bul ṭan theih ni lo mah se, chhungkaw dawm kanna tur Family Oriented SEDP Phase 1 kalpui mekah beneficiary 60,000 hnenah ṭanpuina instalment 2 pek tawh niin, instalment dang pawh la pek chhunzawm zel tum a ni a, Phase 2 bul ṭan leh mek niin, Phase 3 pawh a tahtawlin chhunzawm zel turin ruahman a ni a, ṭanpuina hi 2nd instalment-ah tawp mai lovin cheng nuai thum thleng pek tum a ni, a ti.

Minister Pu K. Lalrinliana chuan kan ram, Mizoramah hausakna a awm tih sawiin, hnam dang inhlawhfaa lo lutte pawhin thawh sen loh an nei a, chu vangin SEDP trade-ah pawh hlawhtlinna a awm tih hre turin beneficiary-te chu a chah a. Ram changkanga an mi hausa tawntawte chu kut hna thawkte an ni ṭhin tih sawiin, taima tak leh tihtak zeta hna kan thawh chuan Pathianin mal min sawmin, min hlawhtlintir ngei ang, a ti a. Beneficiary-te chu an trade thlanah hlawhtling ngei turin duhsakna a hlan a ni.

He hun hi Kolasib District Bawrhsap, Kolasib District Level SEDP Committee Chairman Pu John LT Sanga'n kaihruaiin, hun buatsaih chhan a sawi fiah a. Presbyterian Church of India Diakkawn Pastor Bial bialtu, Pastor H. Zaṭhuama'n hunserh a hmang a. Kolasib District Animal Husbandry & Veterinary Officer Dr Lalsanglien Ralsun, Kolasib District Fisheries Development Officer Pi C. Lallianpuii leh Land Resources, Soil & Water Conservation Department, Kolasib District-a District Officer Pu Z. Lalthanzuala te'n SEDP chungchanga hriat tur pawimawh hrang hrang leh beneficiary-te fuihna thu an sawi a. Kolasib District Rural Development Office-a Project Director Pu Lalmuan Puia'n lawm thu sawiin hun a khar a ni.

He hunah hian sawrkar department leh SEDP line department hrang hrang officer leh staff-te, political party hruaitute leh FOSEDP Phase 2 hnuaia beneficiary-te an kal khawm a. Thu sawi bakah zaithiam zai te ngaihthlak niin, hun hman zawhah beneficiary-te account-a pawisa a luh theihna atana pawimawh APR sign-na hun buatsaih zui a ni.

Family Oriented SEDP Phase 2-ah hian Kolasib District chhungah department hrang hrang pariat - Agriculture; Animal Husbandry & Veterinary; Commerce & Industries; Fisheries; Horticulture; Land Resources, Soil & Water Conservation; Sericulture leh Urban Development & Poverty Alleviation department-te hnuaiah beneficiary 4,438 awmin, Kolasib Constituency bikah beneficiary 1,471 an awm a ni.