3764/2023-2024

2024 Ramtuk thla ni 9: Vawiin khan rulhut hlo pek beihpui thawh khatna, National Deworming Day (NDD) First Round 2024 hawnna hun chu Kolasib Senior Chief Medical Officer Dr RK Lalthlamuana hovin Kolasib District Hospital OPD-ah hman a ni.

Kolasib Sr CMO Dr RK Lalthlamuana chuan rulhut hlo ei pawimawhna sawiin, kum 2016 atangin kum tin February thla leh August thlaah te naupang kum 1 - 19 inkar hnenah rulhut hlo pek runpui kalpui thin a nih thu a sawi a. Rulhut vanga hrisel lohna chi hrang hrang ven nan an fate rulhut hlo eitir ngai pawimawh turin nu leh pa kal khawmte chu a chah a ni.

NDD hawnna hun hi Kolasib DEIC Manager Pi F. Lalremsangi chuan kaihruaiin, NDD kalpui dan report a pe a. Naupang kum 1 - 19 inkarte chu a hmunah rulhut hlo (Tab. Albendazole) eitir nghal an ni.

Kumin NDD First Round-a rulhut hlo pek tur atan hian Kolasib District chhungah kum 1 leh kum 19 inkar target 29,931 an awm a. Vawiin hian District chhunga school, college leh anganwadi centre-ah te rulhut hlo inpek a nih bakah, sikul kal lote chu ASHA te'n an inah kal chilhin an pe bawk a. Target zinga tel si, vawiina pek hman lohte tan February ni 16 khian Mop Up buatsaih a ni ang.

August 2023 round-ah khan Kolasib District chhunga target mi 33,249 atangin mi 32,557 chu rulhut hlo pek niin, hei hi 97.92% a ni a. Mizoram (93.1%) chu India ram pumah pakhatna a ni.