3765/2023-2024

2024 Ramtuk thla ni 9: Mizoram Sawrkara Public Works Department (PWD) Minister Pu Vanlalhlana chuan vawiin khan Mizoram chak lakna kawngpui pawimawh ber pakhat, National Highway 06 & 306 Sairang aṭanga Vairengte inkar kawngpui chu a hmunah tlawhin, a enfiah.

PWD Minister Pu Vanlalhlana hi Mizoram Legislative Assembly Deputy Speaker Pu Lalfamkima, Kolasib bialtu MLA bakah, Chief Engineer (Highways) Er H. Zoramliana leh Chief Engineer (Roads) Er Lalzarliana te'n an ṭawiawm a. Sr Executive Engineer Er R. Lalduhthlanga hovin PWD National Highway Division-III hnuaia official-te, NHIDCL hotute leh contractor-te'n an lo dawngsawng a. Minister hian NH-06 & 306 Sairang - Vairengte kawngpui chu a hmunah enfiahin, department hotute leh NHIDCL lam nen kawng chhe lai siam ṭhat dan tur an sawi ho nghal a ni.

Minister Pu Vanlalhlana chuan Vairengte - Sairang inkar kawngpui NH-306 & 06 chu Mizoram mamawh chakkhai lak luhna kawngpui pawimawh ber pakhat a nih avangin siam ṭhat thuai a ṭul thu a sawi a. Lirthei lian thil rit tak tak phurin a zawh reng a nih avangin a chhe chak hle tih sawiin, kumin fur thlen hma ngeiin thawm ṭhat hna thawh zawh hman a nih theih nan he lai kawng siam ṭha tura hma lakna awm mek pawh chak zawka kalpui turin PWD hotute leh NHIDCL lamte chu a chah a. Contractor-te pawh kawng siam ṭhat nan lungchang ṭha leh hmanraw ṭha chauh hmang turin a chah bawk.

Vairengte aṭanga Sairang inkar kawng hi kilometre 122-a thui a ni a. Kilometre 67.20-a thui chu NHIDCL kutah awmin, kilometre 54.80-a thui chu Mizoram PWD kutah a awm rih thung a. PWD hian a theih ang angin kawng thawm ṭhat hna hi thawk ṭhinin, kumin fur hma hian PWD leh NHIDCL hnuaia kawng awmte chu ngawrh zawka siam ṭhat tumin hma lak mek a ni.