Naktip September ni 28 (Nilaini) khian Kolasib-ah National Disaster Management Authority Day hman a ni dawn a. India ram pumpui huapa din chhiatrupna thlen thulha chhanchhuahna leh chhawmdawlna leh a kaihhnawih hrang hrang te ngaihtuahtu National Disaster Management Authority (NDMA) duhdanin programme hetiang hian duan a ni.

School naupang pawl 9 atanga pawl 12 zirlai 50, sikul hrang hrang atanga thlan chhuahte tan painting competition buatsaih a ni ang a. St. Johns Highers Secondary School-ah zing dar 10 ah tanin chhun dar 12 thlengin an inel dawn a ni. Lemziakah hian naupangte chuan chhiatna thlen thulha chet thawhna kawng te leh chhawdawlna leh chhanchhuahna lam hawi te an ziak ang a. A titha zual pathum hnenah lawmman Rs. 1,500/- , Rs. 1,000/- leh Rs. 750/- te pek an ni ang a, inelna a tel zawng zawng te hnenah participation prize Rs. 100/- theuh pek an ni ang.

Chawhnu dar 1:30 ah DC Conference Hall-ah inkhawm neih a ni ang a. Hetah hian Chhiatrupna chungchang leh a kaihhnawih thil tul dangte zira sawi ho a ni dawn a. He hunah hian thuthar thehdarhtute zawng zawng chu tel vek tura beisei an niin Resource person thlanchhuah ten thu an sawi dawn a ni. Chawhma lama lemziak intihsiaka tithate hnenah lawmman sem a ni bawk ang.

National Disaster Management Authority hi kum 2005 May 30 khan New Delhi ah din alo ni tawhin Prime Minister Chairman na hnuaia din a ni.