Home Minister Pu R. Lalzirliana chuan tunlai khawvela pawikhawihna zinga lian leh thangchak, hlawk ber ni bawk Human Trafficking laka Mizo mipuite buma an awm loh nan leh an him nan Mizoram sorkar Police Department te chuan theihtawp a chhuah zui zel dawn a ni, a ti.

He thu hi Ebenezer Corps Hall, Venghnuai a CHAN buatsaih ‘Anti-Human Trafficking Sunday’ Function, nimin September 25 a neih tuma a sawi a ni. Mihring tawlhruk, human trafficking chungchanga Police Department hmalakna tlangpui tarlangin Minister chuan sorkar laipui puihna a Aizawl leh Lunglei District-ah Anti-Human Trafficking Unit din a nih tawh thu leh Kolasib leh Champhaiah pawh Central atanga din phalna an hmuh tawh thu a sawi a. State Level Training of Trainers buatsaih tawhin AIR leh Doordarshan-ah te Live Phone-in leh Talk Show an buatsaih tawh a, Sorkar mi pawimawh hrang hrang leh NGO te tan sensitization programme bakah zirlaite tan awareness campaign an huaihawt tawh a. Police Officer thlanchhuah mi 24 ten Certificate Course on Anti-Human Trafficking an zirchhuak tawh bawk a ni. Minister chuan Mizoramah Anti-Human Trafficking case kan hmelhriatna a la reiloh hle laia Case kan neih ang te Police lamin heti taka chaka misual chhuichhuah hna an thawk thei chu chhuanawm a ti a. CHAN hmalakna pawh ropui a tih thu tarlangin inpekna thuk zawk nen hmalam pan zel tur leh sorkar nen pawha inrem taka thawkho zel turin a sawm a ni.

United Nations report-a a lan danin kum tin hian khawvel pumah hmeichhia leh naupang maktaduai 2 dawn lai bum chhuah an ni. Sumdawn nan, a khawlo zawng leh danin a phal loh anga dik lo taka chhawr luih an ni a, mi maktaduai tam tak dang pawh anmahni ram ngeiah diklo taka sumdawn nan hman an ni reng bawk a ni. Nawhchizawrhna ringawtah hian ni khatah cheng maktaduai 185 chuang che vel niin a zir miten an chhut a, kum khatah phei chuan cheng tluklehdingawn 370 chuang zet a ni.