Vawiin khan Kolasib Project Veng AMFU Hall-ah National Voters Day vawi 4-na ropui taka lawm a ni a. Pu Jitender Yadav, IAS, DC & District Election Officer chuan he hun hi khuallian nia hmanpuiin ‘Democracy-a kan thuneihna sang ber chu Right to Vote’ hi a ni, a ti.

Pu Yadav chuan, India ram ropui tak, inthlang ram, mipui thuneihna ramah hian he kan Vote theihna hi a hlu em em a. Kan right hi kan hman that chuan Sawrkar tha kan siam thei a, chumi ang bawk chuan sawrkar thalo leh mi thalo pawh he kan right bawk hmang hian kan paihthla daih thei a. Chuvangin a hlu em em a ni, a ti a. Mitin ten a hlutzia hria a, vote kan thlak ngei hi kan tihtur a ni a. Vote kan thlakloh chuan sawrkar kan sawisel thei lovang, a ti. Vawiin National Voters Day ah hian kan thuneihna sanzia hre thar leh ila, Voter tharten in tih apiang chu ram kalsiam ti danglam a siam tha thei a ni, Pu Yadav chuan a ti a. BLO te leh Election office a thawkte inpekna vangin Kolasib district chu 100% EPIC nei thei kan nita a, a ropui hle a ni, a ti bawk.

Pi Saizikpuii, Election Officer, Kolasib chuan National Voters Day lawmna hi a kaihruai a. Election kaihhnawih engkim thawh honaah thawktute inpekna avanga NVD phur taka lawm a ni chu a lawmthu sawiin he ni hi Kolasib bakah Kawnpui leh Vairengte ahte pawh Civil SDO hova hman a nih thu a sawi a ni.

Pu Lalfela Sailo, Addl. DC chuan Vote thlak hlutzia leh Vote neih tangkai zia thu pungkhawmte hmaah a sawi a. Mipuiin Vote kan thlak avangin hruaitu, hotu leh roreltu kan nei a. Sawrkar tha siamtu kan nih ang bawkin diklo pawh paihthlatu kan ni. Hei hi khua leh tui dik tak chanvo a ni a, a hlutzia hre thar ila, updation te pawh hi i ngai pawimawh hle ang u, a ti a. Keini aia hnam mawl tuikuk te pawh hian Vote thlak hlutzia hi an hria a, hmun hla takah pawh kein an pan vang vang peih thin, a ti bawk a ni.

Kolasib District chhung constituency pathuma BLO tha ber thlan chhuahte hnenah chawimawina Citation leh pawisa Rs 3,000/-theuh he hunah hian khuallian chuan a hlan a. Vote nei tharte hnenah EPIC a hlan bawk a ni. National Voters Day puala Essay intihsiaka tithate hnenah lawmman sem a ni bawk.

Voters te hlutzia tarlanna lemchan entir a nih bakah zaithiam zai ngaihthlak a ni bawk .