DIRECTORATE OF INFORMATION & PUBLIC RELATIONS, Government of Mizoram, India

1980/2023-2024

2023 Mimkut thla ni 21: Vawiin khan Kolasib Hmarvengah North Kolasib Games & Sports Association te chuan Kolasib bialtu MLA, Food, Civil Supplies & Consumer Affairs Minister Pu K. Lalrinliana chawimawina hun an buatsaih.

Minister Pu K. Lalrinliana chuan North Kolasib GSA te'n amah chawimawina hun an buatsaih chu lawmawm a tih rualin, chawimawi phu a intih lohzia a sawi a. Hriselna ṭha nei turin mi tinin insawizawi kan mamawh a, chumi kawngah chuan infiamna hmunhma neih ṭhat a pawimawh hle a ni tiin, Hmarvenga a hma lakna piah lamah, Diakkawn khelmual chungchangah te pawh nasa taka a lo buaipui ve tawh dan leh MLA a nih hmasak laia basketball court siam a nih thu te a sawi a. Veng hrang hrangah ṭhalai infiam mite tan hma lak chhunzawm zel a tum thu sawiin, kawng hrang hranga a bial tihhmasawn chu a thil tum lian ber a nih thu a sawi a. North Kolasib GSA te'n khawtlang tana theih tawp chhuaha an hma lakna leh ngaihtuahna an sen ṭhinna chu lawmawm a tih thu sawiin, an kal zelna turah duhsakna a hlan nghal a ni.

He hun hi North Kolasib GSA President Pu Laldinpuia Khiangte chuan a kaihruai a. NKGSA Secretary Pu Johny VL Hruaia chuan report pein, NKGSA chu kum 1953 kuma din a ni tih a tar lang a. Bialtu MLA Pu K. Lalrinliana'n Hmarveng tan thil ropui tak a tihsak dan sawiin, a hma laknaa Basketball Semi Indoor Stadium leh Badminton Hall an neih theih bakah, khawtlang mipuite tan thil tam tak a tihsak tih a sawi a. Hmarveng All NGO te'n Bialtu MLA chawimawina an buatsaihah an tel ve loh avangin tun ṭumah hian Minister Pu K. Lalrinliana chawimawina chu a hrana buatsaih ta an nih thu a sawi a. NKGSA hnuaiah Basketball (Kolasib-a champion lai), Table Tennis, Tug of War (Kolasib-a champion lai) leh Badmintion (Kolasib-a champion lai) te an awm tih sawiin, NKGSA hma laknaah Bialtu MLA-in theih tawpa a ṭawiawmna leh khawtlang mipuite lungrualnaah lawm thu a sawi.

He hunah hian NKGSA Treasurer Pu Lalengkima pawhin thu a sawi a. NKGSA te hian Bialtu MLA Pu K. Lalrinliana hi chawimawina thuziak an hlan a ni.

Attachment